ធនាគារកណ្ដាលទូទាំងពិភពលោកកំពុងបង្កើនការទិញចូលមាស ស្របពេលពិភពលោកស្ថិតក្នុងភាពមិនប្រាកដប្រជា

ស្របពេលពិភពលោកប្រឈមនឹងភាពមិនប្រាកដប្រជាកាន់តែខ្លាំង ធនាគារកណ្តាលទូទាំងពិភពលោកកំពុងបង្កើនការទិញចូលមាស ហើយខណៈដែលការកាន់កាប់មាសរបស់បណ្ដាប្រទេសអភិវឌ្ឍន៍ភាគច្រើនគ្មានការផ្លាស់ប្តូរ ប្រទេសនានា ដូចជាឥណ្ឌា និងមហាយក្សចិន ជាដើម កំពុងបង្កើនការទិញចូលមាសបម្រុងរបស់ខ្លួនជាលំដាប់ចាប់តាំងពីឆ្នាំ២០១៤ មក​។ ធនាគារកណ្ដាល នៃប្រទេសនានាជុំវិញពិភពលោកបានបង្កើនការទិញចូលមាសយ៉ាងច្រើនចន្លោះពីឆ្នាំ២០០៩ ដល់ឆ្នាំ២០២៤ ហើយទិន្នន័យបង្ហាញថា អំឡុងរយៈពេល១៥ឆ្នាំមកនេះ ការកាន់កាប់មាសសរុបបញ្ចូលគ្នារបស់ធនាគារកណ្ដាលទូទាំងពិភពលោកបានកើនឡើងយ៉ាងខ្លាំងពី២ម៉ឺន៦ពាន់តោន ឈានដល់៣ម៉ឺន២ពាន់តោន ពោលគឺកើនឡើងក្នុងអត្រាប្រមាណ៤,១% ក្នុងមួយឆ្នាំ។

ធនាគារកណ្ដាលនានា ទិញចូលមាសជាយុទ្ធសាស្ត្រមួយ ដើម្បីធ្វើពិពិធកម្មទុនបម្រុងអន្តរជាតិ របស់ខ្លួន និងដើម្បីការពារហានិភ័យទប់ទល់នឹងអតិផរណា និងការប្រែបម្រួលនៃតម្លៃរូបិយប័ណ្ណ ដោយក្រុមអ្នកជំនាញអន្តរជាតិ ទទួលស្គាល់ថា មាសជាទ្រព្យសកម្មដ៏គួរឱ្យជឿទុកចិត្ត និងមានសុវត្ថិភាពបំផុតអំឡុងពេលដែលពិភពលោកស្ថិតក្នុងភាពមិនប្រាកដប្រជា និងអស្ថិរភាពនយោបាយ។

ការទិញចូលមាសរបស់បណ្ដាធនាគារកណ្ដាលទូទាំងពិភពលោក បានកើនឡើងយ៉ាងខ្លាំងក្រោយវិបត្តិកូវីដ-១៩ ជាពិសេសដោយសារតែការកើនឡើងនូវភាពតានតឹងផ្នែកនយោបាយ និងជម្លោះព្រំដែន៕

ដោយៈ សរ សុជាតិ