កសិករនៅអាម៉េរិក កំពុងជួបវិបត្តិខ្វះកម្មករ ក្រោយលោក ត្រាំ អនុវត្តច្បាប់អន្តោប្រវេសន៍ដ៏តឹងរ៉ឺង

ការបើកប្រតិបត្តិការអនុវត្តច្បាប់អន្តោប្រវេសន៍លើជនបរទេសនៅតាមបណ្តាកសិដ្ឋាននានារបស់រដ្ឋបាលលោក ដូណាល់ ត្រាំ បានធ្វើឲ្យម្ចាស់កសិដ្ឋាននានា ដែលកំពុងជួបបញ្ហាទីផ្សារស្រាប់ហើយនោះ កំពុងជួបបញ្ហាកសិផលរបស់ពួកគេរងការខូចខាតរលួយស្អុយ ដោយសារខ្វះកម្លាំងពលកម្ម។ បញ្ហាគំរាមកំហែងថ្មីនេះ កំពុងកក្រើកឡើងនៅតាមរដ្ឋ ដែលមានសេដ្ឋកិច្ចពឹងផ្អែកខ្លាំងលើវិស័យកសិកម្មមួយចំនួនដូចជារដ្ឋកាលីហ្វ័រញ៉ា តិចសាស់ និងផេនស៊ីលវ៉ានៀជាដើម។

ក្រោយអាជ្ញាធរអាម៉េរិក ចុះធ្វើប្រតិបត្តិការតាមគោលការណ៍ច្បាប់ ដែលប្រធានាធិបតីអាម៉េរិកលោក ដូណាល់ ត្រាំ ​បានដាក់ចេញ ម្ចាស់កសិដ្ឋាន និងតំណាងកសិដ្ឋានអះអាងថា កសិដ្ឋានរបស់ពួកគេកំពុងជួបវិបត្តិខ្វះកម្មករបំពេញការងាររហូតដល់ទៅ៧០%។

លោកស្រី អាឡិចហ្សានដ្រា សូសា (Alexandra Sossa) នាយកប្រតិបត្តិនៃគម្រោងប្រឹក្សាផ្នៃកកម្មករតាមចម្ការបានលើកឡើងថា បច្ចុប្បន្នសហរដ្ឋអាម៉េរិក មិនមានកម្លាំងការងារគ្រប់គ្រាន់ ដើម្បីធ្វើការងារដោយដៃឡើយនៅពេលនេះ។ លោកស្រីបានបន្តថា កង្វះកម្មករធ្វើការដោយប្រើកម្លាំងនេះមិនត្រឹមតែខ្វះនៅតាមកសិដ្ឋាននោះទេ សូម្បីនៅតាមរោងចក្រវេចខ្ចប់ជាច្រើន ក៏ជួបបញ្ហានេះដែរ៕

ដោយៈ សរ សុជាតិ