បើយោងតាមការចុះផ្សាយរបស់គេហទំព័រ Asean Bernama នៅថ្ងៃទី១៥ ខែធ្នូ ក្រសួងការបរទេសម៉ាឡេស៊ី បាននិយាយថា ការកោះប្រជុំពិសេសរដ្ឋមន្ត្រីរដ្ឋការបរទេសអាស៊ាន គឺធ្វើឡើងតាមការសម្រេចចិត្តរបស់នាយករដ្ឋមន្ត្រី អាន់វ៉ា អ៊ីប្រាហ៊ីម សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា និងនាយករដ្ឋមន្ត្រីថៃ អានុទីន ឆានវីរៈគុល កាលពីថ្ងៃទី១១ ខែធ្នូ ក្នុងកិច្ចខិតខំប្រឹងប្រែង ដើម្បីដោះស្រាយស្ថានការណ៍រវាងកម្ពុជា និងថៃ។ នាយករដ្ឋមន្ត្រីម៉ាឡេស៊ីលោក អាន់វ៉ា អ៊ីប្រាហ៊ីម បន្តស្នើឱ្យភាគីកម្ពុជា-ថៃ បញ្ឈប់ការប្រយុទ្ធគ្នា ហើយថា លោកនៅតែទំនាក់ទំនងជាមួយមេដឹកនាំនៃប្រទេសកម្ពុជា និងប្រទេសថៃ រាល់ថ្ងៃ។
សូមបញ្ជាក់ថា សង្គ្រាមដែលភាគីថៃ បានបញ្ឆេះឡើងដើម្បីចូលឈ្លានពានដែនអធិបតេយ្យភាពរបស់កម្ពុជា ជាថ្មីតាំងពីថ្ងៃទី៧ ខែធ្នូ បានឈានចូលដល់ថ្ងៃទី១០ គិតត្រឹមថ្ងៃទី១៦ ខែធ្នូ ឆ្នាំ២០២៥ ដែលបានបង្កឱ្យជនស៊ីវិលស្លាប់កើនដល់១៥នាក់ របួស៧៤នាក់ និងជនភៀសសឹកឡើងជាង៤០ម៉ឺននាក់។ នេះបើយោងតាមប្រភពផ្លូវការពីក្រសួងការពារជាតិកម្ពុជា៕
