ក្រុមហ៊ុនពាក់ព័ន្ធនឹងកូនប្រុសលោក ត្រាំ កំពុងផ្សព្វផ្សាយ ដើម្បីលក់ដ្រូនប្រឆាំងដ្រូននៅមជ្ឈិមបូព៌ា
ចំពេលដែលជម្លោះរវាងសហរដ្ឋអាម៉េរិក-អ៊ីស្រាអែល និងអ៊ីរ៉ង់ កំពុងរីករាលដាលខ្លាំងជិតឈានចូលសប្តាហ៍ទី៦ ក្រុមហ៊ុនបច្ចេកវិទ្យាអាម៉េរិកមួយ ដែលគ…
យោងតាមការចុះផ្សាយរបស់សារព័ត៌មាន Nikkei Asia គិតត្រឹមថ្ងៃទី៣ ខែមេសា យុវជនប្រមាណ៦៥លាននាក់នៅទូទាំងសកលលោកកំពុងស្ថិតក្នុងស្ថានភាពគ្មានការងារធ្វើ។
អ្នកជំនាញលើកឡើងថា បញ្ហាប្រឈមសេដ្ឋកិច្ចបន្ទាប់របស់អាស៊ី ប្រហែលមិនមែនកើតចេញពីបំណុលនោះទេ ប៉ុន្តែមកពីការកើនឡើងនៃអត្រាអត់ការងារធ្វើរបស់យុវជន ដោយសារយុវជនរាប់លាននាក់ជួបការលំបាកក្នុងការស្វែងរកការងារ ខណៈដែលសេដ្ឋកិច្ចកាន់តែធ្លាក់ដុនដាប ហើយសង្គ្រាមអ៊ីរ៉ង់ ធ្វើឱ្យវិបត្តិនេះកាន់តែធ្ងន់ធ្ងរ។ បញ្ហានេះកំពុងកើនឡើងពាសពេញតំបន់អាស៊ី ជាពិសេសនៅអាស៊ីខាងត្បូង និងអាស៊ីអាគ្នេយ៍ ដែលចំនួនយុវជនយ៉ាងច្រើនបានហក់ចូលក្នុងកម្លាំងពលកម្មលឿនជាងការបង្កើតការងារ ដែលមានន័យថា សម្បូរមនុស្សធ្វើការតែខ្វះការងារ។ ទោះបីជាកម្រិតនៃការអប់រំកើនឡើងយ៉ាងណាក៏ដោយ ក៏ប្រទេសជាច្រើនមិនបានផ្តល់នូវឱកាសការងារដែលមានស្ថិរភាព និងប្រាក់បៀវត្សរ៍គ្រប់គ្រាន់ដែលអាចរស់បានសមរម្យនោះឡើយ។
ពេលនេះ ស្ថានភាពនេះ កាន់តែអាក្រក់ទៅៗ ដោយសារសង្គ្រាមអ៊ីរ៉ង់ ដែលកំពុងបន្តអូសបន្លាយ ដែលបានជំរុញឱ្យប្រេងឥន្ធនៈឡើងថ្លៃ និងអតិផរណាហក់ឡើងខ្ពស់។ ការចំណាយខ្ពស់ និងលក្ខខណ្ឌហិរញ្ញវត្ថុកាន់តែតឹងតែងកំពុងធ្វើឱ្យសកម្មភាពអាជីវកម្មមានភាពយឺតយ៉ាវ ដែលធ្វើឲ្យក្រុមហ៊ុនកាន់តែមានការប្រុងប្រយ័ត្នចំពោះការជួលបុគ្គលិក ដែលភាគច្រើនមានតែកាត់ជម្រុះជាជាងជ្រើសរើសបុគ្គលិកចូលបន្ថែម។
នៅក្នុងបណ្ដាប្រទេសដែលមានសេដ្ឋកិច្ចធំៗដូចជា ប្រទេសចិន ឥណ្ឌា និងឥណ្ឌូនេស៊ីជាដើម ចំនួននិស្សិតបញ្ចប់ការសិក្សានៅតែបន្តកើនឡើង ប៉ុន្តែឱកាសការងារមិនកើនឡើងច្រើនទៅតាមនោះទេ។ កម្មករនិយោជិតវ័យក្មេងជាច្រើនត្រូវបង្ខំចិត្តធ្វើការងារ ដែលមានប្រាក់ខែទាប ឬគ្មានស្ថិរភាព ជាពិសេសនៅក្នុងសេដ្ឋកិច្ចក្រៅប្រព័ន្ធ។
ជាមួយគ្នានេះ កម្មករនិយោជិតអាស៊ីរាប់លាននាក់នៅក្នុងបណ្ដាប្រទេសឈូងសមុទ្រ ដូចជាអេមីរ៉ាតអារ៉ាប់រួមជាដើម ប្រឈមមុខនឹងភាពមិនប្រាកដប្រជា ខណៈដែលភាពតានតឹងផ្នែកភូមិសាស្ត្រនយោបាយកំពុងគំរាមកំហែងដល់ការងារ និងរំហូរប្រាក់បញ្ញើត្រលប់ទៅស្រុក។ ការរីកចម្រើនយ៉ាងឆាប់រហ័ស នៃប្រព័ន្ធស្វ័យប្រវត្តិកម្ម និងបច្ចេកវិទ្យាបញ្ញាសិប្បនិម្មិត AI ក៏កំពុងធ្វើឱ្យទីផ្សារការងារប្រែប្រួលខ្លាំងផងដែរ ដោយបានបន្ថែមសម្ពាធបថែមទៀតទៅលើយុវជន។
ក្រុមអ្នកសេដ្ឋកិច្ចព្រមានថា ប្រសិនបើបញ្ហានេះមិនត្រូវបានដោះស្រាយទេ ភាពអត់ការងារធ្វើរបស់យុវជនខ្ពស់អាចនឹងធ្វើឱ្យកំណើនសេដ្ឋកិច្ចថយចុះ បង្កើនវិសមភាពសង្គម ហើយនឹងប្រែក្លាយចំនួនប្រជាជនវ័យក្មេងដ៏ច្រើននៅអាស៊ីពីគុណសម្បត្តិដ៏សំខាន់ទៅជាហានិភ័យសេដ្ឋកិច្ចធ្ងន់ធ្ងរ៕
ដោយ: តែម សុខុម
