វៀតណាម ស្នើឱ្យអាម៉េរិក ពិចារណាឡើងវិញ ចំពោះការដាក់បម្រាមលើការនាំចេញគ្រឿងសមុទ្ររបស់ខ្លួន

រដ្ឋមន្ត្រីក្រសួងឧស្សាហកម្ម និងពាណិជ្ជកម្មវៀតណាម លោក ង្វៀន ហុងឌៀន (Nguyen Hong Dien) កាលពីថ្ងៃចន្ទ ដើមសប្តាហ៍នេះ បានផ្ញើលិខិតមួយច្បាប់ទៅកាន់រដ្ឋមន្ត្រីក្រសួងពាណិជ្ជកម្មអាម៉េរិក លោក ហូវើដ ឡាត់និក (Howard Lutnick) ដើម្បីសុំឱ្យពិចារណាឡើងវិញចំពោះការសម្រេចចិត្តកាលពីខែសីហា ដោយរដ្ឋបាលមហាសមុទ្រ និងបរិយាកាសជាតិអាម៉េរិក ដែលបានកំណត់ថា វិធីសាស្រ្តនេសាទមួយចំនួនរបស់វៀតណាម បង្កហានិភ័យដល់ថនិកសត្វសមុទ្រ។

សហរដ្ឋអាម៉េរិក ស្ថិតក្នុងចំណោមទីផ្សារអាហារសមុទ្រដ៏ធំបំផុតរបស់វៀតណាម ដោយនៅក្នុងរយៈពេល៨ខែ ឆ្នាំ២០២៥ ការនាំចេញអាហារសមុទ្ររបស់វៀតណាម ទៅអាម៉េរិក កើនឡើងជិត៧% បើធៀបនឹងរយៈពេលដូចគ្នាកាលពីឆ្នាំមុន ដោយឡើងដល់ជាង១ពាន់លានដុល្លារស្មើនឹងជាង១៧% នៃការនាំចេញអាហារសមុទ្រសរុបរបស់វៀតណាម។ នេះបើយោងតាមទិន្នន័យគយវៀតណាម។

អាជ្ញាធរមហាសមុទ្រអាម៉េរិក កាលពីខែសីហា បានជូនដំណឹងដល់ក្រសួងកសិកម្មវៀតណាមថា អាជ្ញាធរនេះបានរកឃើញភាពមិនប្រក្រតីសម្រាប់វិធីសាស្រ្តនេសាទរបស់វៀតណាមចំនួន១២ ដូច្នេះហើយប្រទេសនេះត្រូវបានហាមឃាត់មិនឱ្យនាំចេញត្រី និងផលិតផលត្រីទៅកាន់អាម៉េរិក ចាប់ពីថ្ងៃទី១ ខែមករា ឆ្នាំ២០២៦ តទៅ។

ក្រសួងកសិកម្មវៀតណាម បាននិយាយថា ការហាមឃាត់នេះនឹងធ្វើឱ្យប៉ះពាល់ដល់ការនាំចេញអាហារសមុទ្រសំខាន់ៗរបស់វៀតណាម រួមមានត្រីធូណា ត្រីចំពុះដាវ ត្រីតុកកែ ត្រីមឹក និងក្តាមព្រមទាំងប្រភេទត្រីផ្សេងៗទៀត៕

ដោយ៖ សុខ មង្គល