លោកស្រី កែវ ឆឿត ម្ចាស់សិប្បកម្មអំបុកមួយកន្លែងស្ថិតក្នុងខេត្តបាត់ដំបងបានគូសបញ្ជាក់ប្រាប់ខេមបូណូមីសថា មកដល់ពេលនេះសិប្បកម្មអំបុករបស់លោកស្រី កំពុងមានភាពមមាញឹកក្នុងការផលិត ដើម្បីផ្គត់ផ្គង់តម្រូវការ ខណៈក្នុង១ថ្ងៃអាចផលិតអំបុកបានប្រមាណ៩តោនប៉ុណ្ណោះ។ បើតាមម្ចាស់សិប្បកម្មរូបនេះ អំបុករបស់លោកស្រី ត្រូវបានអាជ្ញាធរ និងអតិថិជនបញ្ជាទិញអស់គ្មានសល់ ខណៈការផលិតមិនទាន់តម្រូវការនោះទេ។ ទោះបីអំបុកកំពុងមានតម្រូវការច្រើនក៏ដោយ តែលោកស្រី កែវ ឈួន អះអាងថា លោកស្រីមិនបានឆ្លៀតឱកាសដំឡើងថ្លៃនោះទេ ខណៈក្នុងអំបុក១គីឡូក្រាមអាចលក់ចេញក្នុងតម្លៃ៤ពាន់រៀល។
ដោយឡែកលោកស្រី សេង សារីន អ្នកលក់អំបុកលក្ខណៈគ្រួសារ ស្ថិតក្នុងខេត្តកំពង់ធំបានឱ្យដឹងថា អំបុករបស់លោកស្រី ក៏ដូចជាអ្នកភូមិឯទៀតដែរ ត្រូវបានអតិថិជនទិញអស់គ្មានសល់ និងអាចលក់បានតម្លៃ៨ពាន់រៀលក្នុង១គីឡូក្រាម។ តម្លៃនេះ ត្រូវបានលោកស្រី អះអាងថា ជាតម្លៃធម្មតាមិនមានការដំឡើងថ្លៃនោះទេ ខណៈក្នុង១ថ្ងៃលោកស្រី ក៏ដូចជាអ្នកភូមិដទៃទៀត អាចផលិតអំបុកបានប្រមាណ៤០គីឡូក្រាមប៉ុណ្ណោះ។
គួរបញ្ជាក់ថា សម្តេចតេជោ ហ៊ុន សែន ប្រធានព្រឹទ្ធសភាកម្ពុជាបានបង្ហោះសារលើទំព័រហ្វេសប៊ុកផ្លូវការនៅថ្ងៃទី១០ ខែធ្នូ ថា សម្តេច បានឃើញសំណូមពរយុទ្ធជនម្នាក់ពីសមរភូមិ ដែលកំពុងប្រយុទ្ធតទល់ការពារទឹកដីពីការឈ្លានពានរបស់យោធាថៃ សុំឱ្យជួយជាអំបុកល្អជាជាងជួយជាមីដល់ពួកគេ។ សម្រាប់សម្តេចតេជោ សំណូមពរនេះជាសំណូមពរសមហេតុសមផល តែសម្តេចយល់ថា ការផ្តល់ជាមីនៅតែបន្តជាមួយនឹងការផ្តល់អំបុកបន្ថែម។ ស្របពេលស្រូវថ្មីកំពុងច្រូតកាត់ សម្តេចតេជោ លើកទឹកចិត្តឱ្យសប្បុរសជនជួយទិញស្រូវធ្វើអំបុក ឬជួយទិញអំបុកពីប្រជាជនយកទៅចែកជូនកងទ័ព ឬជនភៀសសឹក។ សម្តេចតេជោបានលើកឡើងថា៖«ទទួលទានអំបុកស្រូវថ្មីវាយសត្រូវឈ្លានពាន»៕
អត្ថបទ៖ បូ ដូឡា,រូបភាព ឯកសារ
