កម្ពុជានឹងយកថ្ងៃបុណ្យអុំទូករៀបចំពិព័រណ៍ផលិតផលខ្មែរដ៏ធំមួយ ដើម្បីជំរុញការគាំទ្រផលិតផលខ្មែរ

ឧកញ៉ា តែ តាំងប៉ ប្រធានសម្ព័ន្ធសមាគមសហគ្រាសធុនតូច និងមធ្យមកម្ពុជាបានលើកឡើងថា សមាគម SME នឹងរៀបចំម្មវិធីពិព័រណ៍ផលិតផលខ្មែរលើកទីពីរចន្លោះពីថ្ងៃទី៥-៧ ខែវិច្ឆិកា ឆ្នាំ២០២៥ នៅមជ្ឈមណ្ឌលពាណិជកម្ម និងពិព័រណ៍កោះពេជ្រ ដើម្បីជំនួសឱ្យការមិនមានរៀបចំព្រះរាជពិធីបុណ្យអុំទូកនៅភ្នំពេញឆ្នាំនេះ។ ពិព័រណ៍នេះនឹងមានការដាក់តាំងបង្ហាញផលិតផលខ្មែរចំនួន២០០មុខសរុបជិត៣០០ស្ដង់។ បើតាមការអះអាងរបស់ថ្នាក់ដឹកនាំរូបនេះ កាលរៀបចំលើកទី១រយៈពេល៣ថ្ងៃកាលពីខែមុន ពិព័រណ៍ផលិតផលខ្មែរនេះស្រូបទាញអ្នកចូលរួមបានជាង១០ម៉ឺននាក់ជាមួយចំណូលពីការលក់ជិត២លានដុល្លាអាម៉េរិក។

មុនថៃមិនទាន់បិទច្រកព្រំដែនជាឯកតោភាគី កម្ពុជាបានចំណាយថវិកាប្រមាណ៥ពាន់លានដុល្លារក្នុង១ឆ្នាំ ដើម្បីបញ្ជាទិញផលិតពីប្រទេសថៃយកមកផ្គត់ផ្គង់តម្រូវការប្រើប្រាស់ក្នុងស្រុក។ នេះបើតាមការលើកឡើងរបស់លោកឧកញ៉ា តែ តាំងប៉ ដែលបានបន្ថែមថា ក្រោយថៃបិទច្រកព្រំដែន ហើយពលរដ្ឋខ្មែរនាំគ្នាធ្វើពហិការមិនប្រើប្រាស់ផលិតផលថៃ បានជំរុញឱ្យការគាំទ្រផលិតខ្មែរពីសំណាក់ប្រជាពលរដ្ឋមានការកើនឡើងខ្លាំងគួរឱ្យកត់សម្គាល់។

គួរបញ្ជាក់ថា ក្រោយពលរដ្ឋខ្មែរនាំគ្នាធ្វើពហិការមិនប្រើប្រាស់ទំនិញរបស់ថៃ ហើយងាកមកគាំទ្រផលិតក្នុងស្រុកបានធ្វើឱ្យកំណើនការផលិតក្នុងស្រុកកើនឡើងទ្វេដង។ ជាក់ស្ដែងក្នុងខែសីហា ឆ្នាំ២០២៥ មានចំនួនផលិតករបានចុះឈ្មោះបញ្ជីម៉ាកផលិតផលនៅក្រសួងពាណិជ្ជកម្មរហូតដល់ទៅ៣២៤ផលិតផលកើនឡើងជិត២១% បើធៀបនឹងរយៈពេលដូចគ្នាកាលពីឆ្នាំមុន។ នេះបើយោងតាមទិន្នន័យដែលទទួលបានពីក្រសួងពាណិជ្ជកម្ម៕

អត្ថបទដោយ៖ ជា ម៉ារ៉ា