ក្រុមហ៊ុន ឃែស យូ អាប់ ផ្លាស់ប្តូរទីថ្មីក្នុងខេត្តកំពង់ចាម ដើម្បីពង្រីកទីផ្សារឲ្យកាន់តែទូលាយ និងផ្តល់ភាពងាយស្រួលដល់អតិថិជន

ក្រុមហ៊ុន ឃែស យូ អាប់ ដែលជាក្រុមហ៊ុនទទួលបញ្ចាំស្របច្បាប់ និងឈានមុខគេមួយនៅកម្ពុជា ក្រោយពីបើកសាខានៅខេត្តកំពង់ចាមកាលពីឆ្នាំ២០១៦មក ថ្មីៗនេះ បានធ្វើការផ្លាស់ប្តូរទីតាំងថ្មីក្នុងក្រុងកំពង់ចាម ដើម្បីផ្តល់ភាពងាយស្រួលក្នុងការផ្តល់សេវាកម្ម និងប្រាតិភោគដោយអនុប្បទានដល់ពលរដ្ឋដែលរស់នៅក្នុងខេត្តកំពង់ចាម។

លោក គុជ សេដ្ឋា ប្រធានគ្រប់គ្រងទូទៅ នៃក្រុមហ៊ុន ឃែស យូ អាប់ បានថ្លែងថា ដោយសារតែខេត្តកំពង់ចាម ជាខេត្តមានសក្តានុពលខ្ពស់ មានការរីកចម្រើន និងមានប្រជាជនរស់នៅច្រើនផងនោះ បានជំរុញ ឲ្យថ្នាក់ដឹកនាំក្រុមហ៊ុនផ្លាស់ប្តូរទៅកាន់ទៅទីតាំងថ្មី ដែលធំទូលាយជាមុន មានបរិយាកាសល្អជាងមុន នៅជាប់នឹងផ្លូវធំ ដែលមានសក្តានុពល ដើម្បីភាពងាយស្រួលដល់អតិថិជនក្នុងទំនាក់ទំនងដោះស្រាយសាច់ប្រាក់បន្ទាន់ បានល្អប្រសើជាងមុន។

បើតាមប្រធានគ្រប់គ្រងទូទៅ នៃក្រុមហ៊ុន ឃែស យូ អាប់ បានឲ្យដឹងថា សព្វថ្ងៃនេះ ក្រុមហ៊ុនឃែស យូអាប់បានពង្រីកសាខារហូតដល់១៧ហើយ ដោយនៅក្នុងទីក្រុងភ្នំពេញមានសាខារហូតដល់ទៅ៨សាខា និងតាមបណ្តាខេត្តមានចំនួន៩សាខា ។ក្រុមហ៊ុននេះ ក៏មានគម្រោងពង្រីកសាខាឲ្យកាន់តែច្រើនបន្ថែមទៀតឲ្យបាន២៥ខេត្តក្រុង នៅក្នុងរយៈពេល៣ឆ្នាំខាងមុននេះ៕