ផលិតផលគ្រាប់ស្វាយចន្ទីខេត្តកំពង់ធំ នឹងចុះបញ្ជីម៉ាកសម្គាល់ភូមិសាស្រ្តទំនិញនាពេលឆាប់ៗនេះ

លោក អួន ស៊ីឡុត ប្រធានសមាគមស្វាយចន្ទីកម្ពុជា បានគូសបញ្ជាក់ថា វិស័យស្វាយចន្ទីកម្ពុជា ​កំពុងបោះជំហានដ៏សំខាន់មួយឆ្ពោះទៅរកការទទួលបានឋានៈ ជាផលិតផលម៉ាកសម្គាល់ភូមិសាស្ត្រទំនិញ (GI) សម្រាប់គ្រាប់ស្វាយចន្ទីដែលដាំដុះនៅក្នុងខេត្តកំពង់ធំ តួយ៉ាងនាពេលថ្មីៗនេះ សមាគមស្វាយចន្ទីកម្ពុជា បានចូលរួមក្នុងកិច្ចប្រជុំស្តីពី ការកំណត់ភូមិសាស្ត្រទំនិញ ដែលត្រូវបានរៀបចំឡើងដោយ​អង្គការស្បៀងអាហារពិភពលោក និងក្រសួងកសិកម្ម រុក្ខាប្រមាញ់ និងនេសាទ ក្នុងគោលដៅរួម ដើម្បីដាក់គ្រាប់ស្វាយចន្ទីខេត្តកំពង់ធំ ជាផលិតផលម៉ាកសម្គាល់ភូមិសាស្ត្រ ដែលមានការទទួលស្គាល់ជាលក្ខណៈជាតិ និងអន្តរជាតិ។

បើតាមប្រធានសមាគមស្វាយចន្ទីកម្ពុជា រូបនេះ ក្នុងកិច្ចប្រជុំ បានរៀបចំការពិគ្រោះយោបល់ស៊ីជម្រៅនៅមូលដ្ឋានក្នុងខេត្តកំពង់ធំ ជាមួយភាគីពាក់ព័ន្ធ និងអាជ្ញាធរមូលដ្ឋាន នៃខ្សែច្រវាក់តម្លៃរបស់ផលិតផលសម្គាល់ភូមិសាស្ត្រ ដើម្បីជំរុញការបង្កើត សមាគមសម្គាល់ភូមិសាស្ត្រទំនិញ ជាមុនសិន និងបន្ដសិក្សាអំពីយុទ្ធសាស្រ្តបច្ចេកទេសក្នុងការជំរុញការចុះបញ្ជីផលិតផលគ្រាប់ស្វាយចន្ទីក្នុងខេត្តកំពង់ធំ ជាម៉ាកសម្គាល់ភូមិសាស្រ្តឱ្យបានឆាប់។

បើតាម លោក អួន ស៊ីឡុត នៅពេលដែលគ្រាប់ស្វាយចន្ទីរបស់ខេត្តកំពង់ធំ ទទួលបានឋានៈជា ផលិតផល GI នោះវានឹងផ្តល់អត្ថប្រយោជន៍ច្រើនសម្រាប់ឧស្សាហកម្មគ្រាប់ស្វាយចន្ទីរបស់ខេត្តកំពង់ធំ ដែលអាចជំរុញការបង្កើនតម្លៃទីផ្សារផលិតផល និងសក្តានុពលនាំចេញ ក៏ដូចជារក្សាចំណេះដឹងកសិកម្មតាមបែបប្រពៃណី រួមចំណែកដល់ការអភិវឌ្ឍន៍ជនបទ ដោយការពារផលិតផលក្នុងស្រុក និងផ្តល់អំណាចដល់អ្នកផលិតតាមរយៈម៉ាកសមូហភាព។

​របាយការណ៍ពីក្រសួងពាណិជ្ជកម្មបង្ហាញថា គិតមកទល់ពេលនេះ ផលិតផលចុះបញ្ជីម៉ាកសម្គាល់ភូមិសាស្រ្តទំនិញចំនួន៨មុខ ដោយក្នុងនោះរួមមាន ម្រេចកំពត, ស្ករត្នោតកំពង់ស្ពឺ, ក្រូចថ្លុងកោះទ្រង់, ទឹកឃ្មុំព្រៃមណ្ឌលគិរី, អំបិល និងផ្កាអំបិលកំពត, បង្កងតាកែវ, និងទឹកត្រីកំពតកែប និងប្រហុកសៀមរាប។

ម៉ាកសម្គាល់ភូមិសាស្ត្រទំនិញ គឺជាឧបករណ៍កម្មសិទ្ធិបញ្ញាមួយ ដែលដើរតួនាទីយ៉ាងសំខាន់ក្នុងការលើកកម្ពស់សហគ្រិនភាព ការអភិវឌ្ឍសហគមន៍កសិកម្ម បង្កើនចំណូលរបស់សហគមន៍ បង្កើតភាពប្រកួតប្រជែង និងតម្លៃបន្ថែមផ្នែកពាណិជ្ជកម្ម ដែលរួមចំណែកក្នុងការអភិវឌ្ឍសង្គម សេដ្ឋកិច្ច វប្បធម៌ និងទេសចរណ៍៕