ចិន ប្រកាសផ្អាកនាំចេញប្រេងឥន្ធនៈ ដែលបង្កក្តីបារម្ភកាន់តែខ្លាំងសម្រាប់តំបន់អាស៊ី

​​ចិន ដែលជាប្រទេសនាំចូលប្រេងឆៅធំជាងគេបំផុត និងជាអ្នកនាំចេញផលិតផលប្រេងសម្រេចធំលំដាប់ទី៤ នៅក្នុងទ្វីបអាស៊ី បានប្រកាសជាចំហពីការផ្អាកផ្គត់ផ្គង់ប្រេងឥន្ធនៈទៅកាន់ទីផ្សារក្រៅប្រទេស។ ចិន គឺជាប្រទេសតែមួយគត់ ដែលនៅតែអាចទទួលបានប្រេងយ៉ាងច្រើនសន្ធឹកសន្ធាប់ពីមជ្ឈិមបូព៌ា ជាពិសេសពីប្រទេសអ៊ីរ៉ង់ ចាប់តាំងពីការផ្ទុះសង្គ្រាមរវាងអាម៉េរិក-អ៊ីស្រាអែលប្រឆាំងនឹងអ៊ីរ៉ង់ កាលពីថ្ងៃទី២៨ ខែកុម្ភៈ មក។

អ្នកវិភាគបានព្រមានថា បម្រាមនាំចេញប្រេង ដែលមានតម្លៃសរុបប្រមាណ២២ពាន់លានដុល្លារក្នុងមួយឆ្នាំរបស់ចិននេះ នឹងធ្វើឱ្យបណ្តាប្រទេស ដែលពឹងផ្អែកលើការនាំចូលប្រេងម៉ាស៊ូត សាំង និងប្រេងយន្តហោះក្នុងតំបន់អាស៊ីដូចជាអូស្ត្រាលី បង់ក្លាដែស និងហ្វីលីពីន នឹងជួបការលំបាក។ បើទោះបីជាកន្លងមក ទីក្រុងប៉េកាំង តែងតែគ្រប់គ្រងការនាំចេញតាមរយៈប្រព័ន្ធកូតាក៏ដោយ ប៉ុន្តែការដាក់បម្រាមទាំងស្រុងនៅពេលនេះ គឺជាបញ្ហាប្រឈមថ្មីសម្រាប់សន្តិសុខថាមពលនៅអាស៊ី។

លោក ហ្សាមៀរ យូសូហ្វ (Zameer Yusof) អ្នកវិភាគនៅក្រុមហ៊ុន Kpler បានលើកឡើងថា តម្រូវការឥន្ធនៈនៅអាស៊ី កំពុងស្ថិតក្នុងភាពរង្គោះរង្គើ ដោយសារអ្នកនាំចេញដែលនៅសល់ក្នុងតំបន់ មិនមានសមត្ថភាពគ្រប់គ្រាន់ក្នុងការបំពេញចន្លោះប្រហោង ដែលចិន បានបន្សល់ទុកនោះទេ។ លោកបន្ថែមថា អវត្តមាននៃប្រេងពីចិន នឹងធ្វើឱ្យបរិមាណប្រេងបម្រុងក្នុងតំបន់កាន់តែខើចទៅៗ ដែលនាំឱ្យតម្លៃហក់ឡើងកាន់តែខ្ពស់ក្នុងរយៈពេលដ៏ខ្លីខាងមុខ។

ជាក់ស្តែងកាលពីថ្ងៃទី១៧ ខែមីនា តម្លៃប្រេងនៅអាស៊ី បានហក់ឡើងដល់កម្រិតអាសន្នក្នុងប្រេងម៉ាស៊ូត បានកើនឡើងដល់១៥០ដុល្លារក្នុងមួយបារ៉ែល, ប្រេង​យន្តហោះកើនឡើងដល់១៦៣ដុល្លារក្នុងមួយបារ៉ែល និងប្រេងសាំងកើនឡើងដល់១៣៩,៨ដុល្លារក្នុងមួយបារ៉ែល។ ការឡើងថ្លៃស្ទើរតែគុណនឹងពីរនេះ កំពុងឆ្លុះបញ្ចាំងយ៉ាងច្បាស់ពីវិបត្តិថាមពលសកល ដែលបង្កឡើងដោយភ្លើងសង្គ្រាម និងការផ្លាស់ប្តូរគោលនយោបាយផ្គត់ផ្គង់ពីមហាអំណាចសេដ្ឋកិច្ចនៅអាស៊ីមួយនេះ៕

ដោយៈ សរ សុជាតិ