ចិន បង្កើនការចំណាយយ៉ាងសម្បើមរហូតដល់ទៅ២១ពាន់លានដុល្លារលើការធ្វើសមយុទ្ធយោធានៅក្នុងតំបន់

មហាយក្សចិន ដែលជាមហាអំណាចសេដ្ឋកិច្ចធំបំផុតទី២របស់ពិភពលោក បានសម្រុកបង្កើនការចំណាយយ៉ាងសម្បើមរហូតដល់ទៅប្រមាណ២១ពាន់លានដុល្លារអាម៉េរិក លើការធ្វើសមយុទ្ធយោធាក្នុងឆ្នាំ២០២៤ នៅច្រកសមុទ្រតៃវ៉ាន់ សមុទ្រចិនខាងត្បូង សមុទ្រចិនខាងកើត និងតំបន់ប៉ាស៊ីហ្វិកខាងលិច ដោយកើនឡើងជិត៤០% បើធៀបនឹងឆ្នាំ២០២៣។ នេះបើយោងតាមការប៉ាន់ប្រមាណរបស់រដ្ឋាភិបាលកោះតៃវ៉ាន់ ដែលធ្វើឡើងដោយផ្អែកលើការតាមដានការចំណាយក្នុងបេសកកម្មរបស់យន្តហោះចម្បាំង និងនាវាចម្បាំង និងការចំណាយប្រតិបត្តិការផ្សេងៗទៀតរបស់កងទ័ពចិន។

តួលេខនៃការចំណាយនេះបានមកពីការស្រាវជ្រាវផ្ទៃក្នុងរបស់យោធាតៃវ៉ាន់ ដោយផ្អែកលើការតាមដានលើចំនួនបេសកកម្មរបស់យន្តហោះចម្បាំង និងនាវាចម្បាំងរបស់មហាយក្សចិន និងការគណនាការចំណាយប្រតិបត្តិការផ្សេងៗដូចជាប្រេងឥន្ធនៈ ការថែទាំ និងប្រាក់ខែរបស់កងទ័ពជាដើម។ ទិន្នន័យលម្អិតបានបង្ហាញថា យន្តហោះចម្បាំងរបស់មហាយក្សចិនបានចេញប្រតិបត្តិការជិត១ម៉ឺន២ពាន់បេសកកម្ម ចំណែកនាវាចម្បាំងរបស់កងទ័ពជើងទឹកចិនបានចេញប្រតិបត្តិការជាង៨ម៉ឺន៦ពាន់បេសកកម្ម។ ទិន្នន័យដដែលបានបង្ហាញទៀតថា ប្រតិបត្តិការកងទ័ពជើងទឹករបស់មហាយក្សចិនធ្វើឡើងប្រមាណ៣៤% នៅសមុទ្រចិនខាងត្បូង ២៨% ធ្វើឡើងនៅសមុទ្រចិនខាងកើត និង១៤% ធ្វើឡើងនៅច្រកសមុទ្រតៃវ៉ាន់។

សូមបញ្ជាក់ថា តួលេខ២១ពាន់លានដុល្លារអាម៉េរិកនេះ គឺស្មើ៩%ប៉ុណ្ណោះនៃថវិកាការពារជាតិ ជាង២៣៣ពាន់លានដុល្លារអាម៉េរិករបស់ប្រទេសចិននៅក្នុងឆ្នាំ២០២៤។ ទោះជាយ៉ាងណា អ្នកការទូតជាច្រើនជឿជាក់ថា ក្រុងប៉េកាំងរាយការណ៍មិនគ្រប់ចំនួនតាមការចំណាយជាក់ស្ដែងនោះទេ ពោលគឺមានន័យថា កញ្ចប់ថវិកាការពារជាតិជាក់ស្ដែងរបស់មហាយក្សចិន អាចច្រើនជាងនេះ៕

ដោយ: តែម សុខុម