ចិន កំពុងព្យាយាមបន្ធូរបន្ថយការព្រួយបារម្ភរបស់វិនិយោគិនជប៉ុន ដែលកំពុងវិនិយោគនៅប្រទេសខ្លួន

លោក លីវ ជីងសុង អគ្គនាយកនៃអគ្គនាយកដ្ឋានកិច្ចការអាស៊ីនៃក្រសួងការបរទេសចិន បានព្យាយាមនិយាយបន្ធូរបន្ថយក្តីបារម្ភរបស់ក្រុមហ៊ុនជប៉ុន ដែលកំពុងវិនិយោគនៅប្រទេសចិន ជុំវិញការកើនឡើងកម្តៅជម្លោះការទូតរវាងចិន និងជប៉ុន ព្រោះលោកចង់ឱ្យក្រុមហ៊ុនជប៉ុន ធ្វើអាជីវកម្មនៅក្នុងប្រទេសចិន ដោយគ្មានការព្រួយបារម្ភ បើទោះបីក្នុងជំនួបរវាងលោកជាមួយលោក ម៉ាសាអាគី កាណៃ (Masaaki Kanai) អគ្គនាយកនៃអគ្គនាយកដ្ឋានកិច្ចការអាស៊ីនៃក្រសួងការបរទេសជប៉ុន បានបញ្ចប់ដោយមិនមានលទ្ធផលជាដុំកំភួនក៏ដោយ។

សារព័ត៌មាន Nikkei Asia បានរាយការណ៍ថា លោក លីវ បានបង្ហាញភាពសិទ្ធស្នាលជាមួយថ្នាក់ដឹកនាំក្រុមហ៊ុនជប៉ុន ខណៈពេលនេះ សេដ្ឋកិច្ចចិន កំពុងប្រឈមនឹងបញ្ហាការធ្លាក់ចុះតម្រូវការក្នុងស្រុក និងការធ្លាក់ចុះការវិនិយោគបរទេស។ ស្ថិតក្នុងស្ថានភាពនេះ ចិន កំពុងត្រូវការ និងយកចិត្តក្រុមហ៊ុនបរទេសក្នុងស្រុក ស្របពេលដែលកាសែត China Daily បានរាយការណ៍ថា ការវិនិយោគពីប្រទេសជប៉ុន នៅចិន កំពុងបង្ហាញនិន្នាការកើនឡើង។

ប្រភពដដែលបានរាយការណ៍ថា ការវិនិយោគរបស់ជប៉ុន នៅក្នុងប្រទេសចិន នៅក្នុងរយៈពេល ៩ខែ ឆ្នាំ២០២៥ បានបង្ហាញពីទំនាក់ទំនងសេដ្ឋកិច្ចដ៏រឹងមាំរវាងប្រទេសមហាអំណាចផលិតកម្មទាំងពីរ ចំពេលមានការកើនឡើងការគាំពារនិយម និងការកកស្ទះខ្សែច្រវាក់ផ្គត់ផ្គង់សកល។ ប្រទេសចិន ទាក់ទាញការវិនិយោគផ្ទាល់ពីបរទេសបានប្រមាណ ៨១ពាន់លានដុល្លារ ដោយលំហូរចូលពីប្រទេសជប៉ុន បានកើនឡើងជាង ៥៥%៕

ដោយៈ សរ សុជាតិ