មេដឹកនាំកំពូលៗរបស់ចិននឹងប្រជុំគ្នា ដើម្បីពិនិត្យផែនការអភិវឌ្ឍន៍សេដ្ឋកិច្ចរយៈពេល៥ឆ្នាំទៅមុខរបស់ចិន

មេដឹកនាំកំពូលៗរបស់ចិន នឹងជួបប្រជុំគ្នានៅទីក្រុងប៉េកាំង ប្រទេសចិន ក្នុងសប្តាហ៍នេះ ដើម្បីសម្រេចលើផែនការ និងគោលដៅសំខាន់ៗរបស់ប្រទេសចិន។ ជារៀងរាល់ឆ្នាំ ស្ថាប័ននយោបាយកំពូលរបស់ចិន គឺគណៈកម្មាធិការមជ្ឈិមបក្សកុម្មុយនីស្តចិន តែងកោះប្រជុំមន្ត្រីកំពូលៗរបស់ចិន សម្រាប់កិច្ចប្រជុំរយៈពេលមួយសប្តាហ៍ ដែលត្រូវបានគេហៅថា ជាកិច្ចប្រជុំពេញអង្គ។

បញ្ហាដែលស្ថាប័នកំពូលនេះ ត្រូវពិភាក្សាគ្នាក្នុងកិច្ចប្រជុំខាងមុខនេះ គឺផ្ដោតលើមូលដ្ឋាននៃផែនការ៥ឆ្នាំថ្មីរបស់ប្រទេសចិន ដែលជាផែនការមេមួយសម្រាប់ប្រទេសមានសេដ្ឋកិច្ចធំជាងគេលំដាប់ទីពីរនៅលើពិភពលោកមួយនេះ ដើម្បីអនុវត្តចន្លោះពីឆ្នាំ២០២៦ និងឆ្នាំ២០៣០។ ផែនការពេញលេញនឹងមិនទាន់បង្ហាញក្នុងកិច្ចប្រជុំនេះទេ រហូតទាល់ដល់ឆ្នាំក្រោយ ប៉ុន្តែមន្ត្រីចិន ទំនងជានឹងប្រាប់ពីខ្លឹមសារ នៃផែនការនេះនៅថ្ងៃពុធ សប្ដាហ៍នេះ ហើយនឹងផ្តល់ព័ត៌មានលម្អិតបន្ថែមទៀតក្នុងរយៈពេលមួយសប្តាហ៍ទៀតរាប់ពីថ្ងៃថ្ងៃពុធ នោះទៅ។

លោក នែល ថូម៉ាស (Neil Thomas) អ្នកជំនាញផ្នែកនយោបាយចិន នៅវិទ្យាស្ថានគោលនយោបាយសង្គមអាស៊ី បាននិយាយថា គោលនយោបាយលោកខាងលិចអាចដំណើរការទៅបាន គឺអាស្រ័យលើវដ្តនៃការបោះឆ្នោត ប៉ុន្តែការបង្កើតគោលនយោបាយនៅចិន គឺពឹងផ្អែកលើ វដ្តនៃការធ្វើផែនការដែលជាប្លង់មេ។ សម្រាប់អ្នកជំនាញរូបនេះ ផែនការ៥ឆ្នាំថ្មីរបស់ចិននឹងបង្ហាញពីអ្វីដែលចិន ចង់សម្រេចបាននាពេលអនាគត និងផ្ដល់សញ្ញានៃទិសដៅដែលថ្នាក់ដឹកនាំចិន ចង់ធ្វើដំណើរទៅមុខ និងផ្លាស់ទីទៅរកការសន្និដ្ឋានមួយដែលបានកំណត់ទុក៕

ដោយ៖ សុខ មង្គល