ចិនស្នើឱ្យប្រទេសទាំងអស់ឈរលើភាពត្រឹមត្រូវ និងប្រកាន់ភ្ជាប់ច្បាប់ពាណិជ្ជកម្មអន្តរជាតិ

ការព្រមាននេះធ្វើឡើងចំពេលមហាអំណាចទាំងពីរកំពុងប្រជែងគ្នាដណ្ដើមដៃគូពាណិជ្ជកម្ម បន្ទាប់ពីបានដាក់ពន្ធលើគ្នាទៅវិញទៅមកមិនធ្លាប់មានពីមុនមក។

ក្រសួងពាណិជ្ជកម្មចិន បានអះអាងថា សហរដ្ឋអាម៉េរិក​ កំពុងដាក់ពន្ធដោយគ្មានរើសមុខលើដៃគូពាណិជ្ជកម្មទាំងអស់របស់ខ្លួន និងបង្ខិតបង្ខំប្រទេសដទៃឱ្យដាក់ពាក្យសុំចរចាលើបញ្ហាពន្ធទៅវិញទៅមកជាមួយខ្លួន។ យ៉ាងណាមិញក្រសួងពាណិជ្ជកម្មចិន ស្នើឱ្យប្រទេសទាំងអស់ ដែលត្រៀមចរចាជាមួយសហរដ្ឋអាម៉េរិក ត្រូវឈរលើភាពត្រឹមត្រូវ និងប្រកាន់ខ្ជាប់នូវច្បាប់ពាណិជ្ជកម្មអន្តរជាតិ។ ក្រសួងពាណិជ្ជកម្មចិន បានព្រមានថា ចិននឹងប្រឆាំងយ៉ាងម៉ឺងម៉ាត់ចំពោះភាគីណា ដែលធ្វើឱ្យប៉ះពាល់ដល់ផលប្រយោជន៍របស់ប្រទេសចិន ហើយចិននឹងចាត់វិធានការតបតវិញយ៉ាងម៉ឺងម៉ាត់។

ការព្រមានរបស់ក្រសួងពាណិជ្ជកម្មចិននេះ ធ្វើឡើងចំពេលពិភពលោកកំពុងឃ្លាំមើលមន្ត្រីជប៉ុនចូលរួមចរចាពាណិជ្ជកម្មជាមួយទីក្រុងវ៉ាស៊ីនតោន ក្នុងអំឡុងពេលផ្អាកការអនុវត្តចំនួន៩០ថ្ងៃលើការយកពន្ធសម្រាប់ប្រទេសនានា លើកលែងតែប្រទេសចិន។ ប្រេសិតពាណិជ្ជកម្មរបស់ប្រទេសជប៉ុន បានជួបជាមួយលោក ដូណាល់ ត្រាំ កាលពីប្តាហ៍មុន ហើយរដ្ឋមន្ត្រីហិរញ្ញវត្ថុជប៉ុនលោក កាតស៊ូណូប៊ូ កាតូ (Katsunobu Kato) នឹងជួបជាមួយរដ្ឋមន្ត្រីក្រសួងរតនាគារអាម៉េរិក លោក ស្កត់ បេសេន (Scott Bessent) នៅសប្តាហ៍នេះ ដើម្បីពិភាក្សាលើបញ្ហារូបិយប័ណ្ណ ក្រោយប្រធានាធិបតីចិន លោក ស៊ី ជីនពីង បានមកបំពេញទស្សនកិច្ចនៅប្រទេសក្នុងតំបន់អាស៊ីអាគ្នេយ៍ចំនួន៣ រួមមាន កម្ពុជា វៀតណាម និងម៉ាឡេស៊ី ដើម្បីពង្រឹងទំនាក់ទំនងសេដ្ឋកិច្ចក្នុងតំបន់។

ចិន និងអាម៉េរិក បានដំឡើងពន្ធដាក់គ្នាទៅវិញទៅមកគួរឱ្យព្រួយបារម្ភ ក្នុងនោះសហរដ្ឋអាម៉េរិក បានដាក់ពន្ធរហូតដល់២៤៥% លើការនាំចូលរបស់ចិន ទៅកាន់សហរដ្ឋអាម៉េរិក រួមទាំងការយកពន្ធដែលបានដាក់កាលពីពេលកន្លងទៅ ខណៈចិន បានដាក់ពន្ធ១២៥% លើការនាំចូលទំនិញរបស់សហរដ្ឋអាម៉េរិក។

ក្រោមសម្ពាធពន្ធរបស់សហរដ្ឋអាម៉េរិក ក្រុមអ្នកសេដ្ឋកិច្ចភាគច្រើនជឿថា រដ្ឋាភិបាលចិននឹងពិបាកសម្រេចបាននូវគោលដៅកំណើនផលិតផលក្នុងស្រុកសរុបរបស់ខ្លួនក្នុងរង្វង់៥% នៅឆ្នាំនេះ ប្រសិនបើសង្គ្រាមពន្ធគយនៅតែបន្តអូសបន្លាយពេល៕

អត្ថបទ៖ សុខ មង្គល