តើប្រធានាធិបតីចិន លោក ស៊ី ជីនភីង ពិតជាមានគម្រោងចូលនិវត្តមែនឬ?
ក្រោយក្តោបក្តាប់អំណាចអស់រយៈពេលជាង១០ឆ្នាំ បុរសខ្លាំងរបស់រដ្ឋចិន លោក ស៊ី ជីនភីង ត្រូវបានអ្នកវិភាគលើកឡើងថា លោកកំពុងមានបំណងចង់ចូលនិវត្ត ប…
ទីក្រុងប៉េកាំង បានព្រមានរដ្ឋបាលលោក ដូណាល់ ត្រាំ ដែលកំពុងប្រើកិច្ចព្រមព្រៀងពាណិជ្ជកម្មជាមួយប្រទេសដទៃធ្វើឱ្យប៉ះពាល់ដល់ផលប្រយោជន៍របស់ចិន និងប៉ុនប៉ងកាត់ប្រទេសចិន ចេញពីខ្សែច្រវាក់ផ្គត់ផ្គង់ពិភពលោក។ លើសពីនេះ ចិន បានព្រមានថា ចិននឹងចាត់វិធានការតតប ប្រសិនបើអាម៉េរិក ដាក់ពន្ធលើទំនិញចិន នៅខែក្រោយ និងបញ្ឈប់ការប៉ុនប៉ងក្នុងការកាត់ផ្តាច់ចិន ចេញពីខ្សែច្រវាក់ផ្គត់ផ្គង់។
ទីក្រុងវ៉ាស៊ីនតោន និងទីក្រុងប៉េកាំង បានយល់ព្រមលើក្របខណ្ឌពាណិជ្ជកម្មមួយចំនួនកាលពីខែមិថុនា ក្រោយការចរចានៅប្រទេសស្វីស និងនៅទីក្រុងឡុងដ៏ ប្រទេសអង់គ្លេស ដោយសម្រួលការដាក់សម្ពាធពន្ធ រយៈពេល៩០ថ្ងៃ។ ប៉ុន្តែកាលពីថ្ងៃទី៧ ខែកក្កដា អាម៉េរិក បានជូនដំណឹងថា គំនាបពន្ធនឹងចូលជាធរមានចាប់ពីថ្ងៃទី១ ខែសីហា ប្រសិនបើចិន គ្មានកិច្ចព្រមព្រៀងពាណិជ្ជកម្មទ្វេរភាគីជាមួយខ្លួនទេនោះ។
ការចេញមកព្រមានខាងលើធ្វើឡើងក្រោយចិន មើលឃើញថា កិច្ចព្រមព្រៀងនានាដែលសហរដ្ឋអាម៉េរិក សម្រេចបានជាមួយប្រទេសចំនួន១២ប្រទេស ជាពិសេសជាមួយប្រទេសវៀតណាម បានគំរាមកំហែងដល់ខ្សែច្រវាក់ផ្គត់ផ្គង់របស់ចិន ហើយចិននឹងចាត់វិធានការយ៉ាងម៉ឺងម៉ាត់ ដើម្បីការពារសិទ្ធិ និងផលប្រយោជន៍ស្របច្បាប់របស់ចិន។
វិទ្យាស្ថាន Peterson សម្រាប់សេដ្ឋកិច្ចអន្តរជាតិ បាននិយាយថា ពន្ធជាមធ្យមរបស់អាម៉េរិក ដាក់លើការនាំចេញរបស់ចិន បច្ចុប្បន្នមានក្នុងរង្វង់៥១,១% ខណៈពន្ធជាមធ្យមរបស់ចិន ដាក់លើទំនិញអាម៉េរិក មានក្នុងរង្វង់៣២,៦%។ ប៉ុន្តែអត្រាពន្ធនេះនឹងកើនឡើងបន្ថែមទៀត ក្រោយអាម៉េរិក កំពុងព្យាយាមដកចិនចេញពីខ្សែច្រវាក់ផ្គត់ផ្គង់ពិភពលោក ដូចអ្វីដែលគេឃើញនៅក្នុងកិច្ចព្រមព្រៀងពាណិជ្ជកម្មរវាងអាម៉េរិក និងវៀតណាម ដែលអាម៉េរិក ជំរុញវៀតណាម កាត់បន្ថយការនាំចូលវត្ថុធាតុដើមពីចិន។ កិច្ចព្រមព្រៀង២០% លើទំនិញផលិតនៅវៀតណាម និង៤០% លើទំនិញដែលប្រើប្រាស់វៀតណាម ជាច្រកឆ្លងកាត់ទៅអាម៉េរិក គឺសំដៅលើចិន តែម្តង។
កាសែត People Daily បានរាយការណ៍ថា ប្រទេសចិន ប្រឆាំងយ៉ាងម៉ឺងម៉ាត់ចំពោះភាគីណាដែលប្រើប្រាស់ផលប្រយោជន៍របស់ចិន ទៅដូរនឹងការសម្បទានពន្ធរបស់អាម៉េរិក។ ហើយព្រមានថា ប្រសិនបើស្ថានភាពបែបនេះកើតឡើងមែន នោះចិននឹងឆ្លើយតបយ៉ាងម៉ឺងម៉ាត់ ដើម្បីការពារផលប្រយោជន៍ស្របច្បាប់របស់ខ្លួន៕
ដោយៈ សរ សុជាតិ
