រដ្ឋមន្ត្រីការពារជាតិចិនជំរុញឱ្យពិភពលោកស្តារសណ្តាប់ធ្នាប់ឡើងវិញ និងបញ្ចៀសការប្រើប្រាស់ច្បាប់ព្រៃ

រដ្ឋមន្ត្រីការពារជាតិចិនលោក ដុង ជន (Dong Jun) ជំរុញឱ្យមានការខិតខំប្រឹងប្រែងកាន់តែខ្លាំងឡើងក្នុងការស្តារឯកភាពពិភពលោក ដែលកំពុងមានការបែកបាក់កាន់តែខ្លាំង ហើយបានប្រកាសប្រឆាំងនឹងប្រទេសណាដែលប្រើប្រាស់ច្បាប់ព្រៃ។ លោកបានសង្កត់ធ្ងន់ថា ពិភពលោកបច្ចុប្បន្នហាក់កំពុងស្ថិតក្នុងស្ថានភាពនៃសង្គ្រាមត្រជាក់ អនុត្តរភាព និងការការពារនិយម។ ការលើកឡើងបែបនេះធ្វើឡើងក្នុងវេទិកា Beijing Xiangshan Forum ដែលមានប្រតិភូមកពី១០០ប្រទេសចូលរួម។

រដ្ឋមន្ត្រីការពារជាតិចិនរូបនេះបានព្រមានថា ការជ្រៀតជ្រែកផ្នែកយោធាពីខាងក្រៅ ការស្វែងរកឥទ្ធិពល និងការបង្ខិតបង្ខំប្រទេសនានាឱ្យចូលជារដ្ឋភាគីណាមួយ នឹងធ្វើឱ្យសហគមន៍អន្តរជាតិមានភាពវឹកវរ។ លោកសង្កេតឃើញថា ពិភពលោកបច្ចុប្បន្នហាក់ស្ថិតក្នុងស្ថានភាពបែកបាក់ ដូច្នេះពិភពលោក ពិសេសតំបន់អាស៊ីប៉ាស៊ីហ្វិកគួរតែជ្រើសរើសការសន្ទនាជាជាងការប្រឈមមុខដាក់គ្នា។

រដ្ឋមន្ត្រីរូបនេះបានគូសទៀតថា ការឈ្លក់វង្វេងជាមួយភាពខ្លាំងដាច់គេនៃកម្លាំងយោធា នឹងនាំពិភពលោកទៅរកភាពវឹកវរ និងការប្រើប្រាស់ច្បាប់ព្រៃ ប៉ុន្តែចិនប្តេជ្ញាជ្រោមទង់នៃសន្តិភាព។ ទន្ទឹមនឹងនេះរដ្ឋមន្ត្រីការពារជាតិចិន ក៏បានឆ្លៀតបញ្ជូនសារទៅកាន់ពិភពលោកថា ចិនរក្សាគោលនយោបាយបើកចំហ ដើម្បីរក្សាសណ្តាប់ធ្នាប់អន្តរជាតិ ប៉ុន្តែកងទ័ពរំដោះប្រជាជនចិននឹងមិនអនុញ្ញាតឱ្យការប៉ុនប៉ងបំបែកខ្លួនរបស់តៃវ៉ាន់កើតមានឡើងជាដាច់ខាត។ សម្រាប់លោក ដុង ការវិលត្រឡប់របស់តៃវ៉ាន់មករួមជោគវាសនាជាមួយចិន គឺជាផ្នែកសំខាន់មួយ នៃសណ្តាប់ធ្នាប់អន្តរជាតិ ហើយចិនត្រៀមខ្លួនជាស្រេច ដើម្បីរារាំងការជ្រៀតជ្រែកខាងយោធាពីខាងក្រៅគ្រប់ពេលវេលា៕

ដោយៈ សរ សុជាតិ