ស្ថានទូតចិននៅថៃ ច្រានចោលព័ត៌មានដែលថា ចិន ផ្គត់ផ្គង់អាវុធឱ្យកម្ពុជា ធ្វើសង្គ្រាមជាមួយថៃ

ស្ថានទូតចិន ប្រចាំប្រទេសថៃ បានចេញសេចក្តីថ្លែងការណ៍មួយកាលពីថ្ងៃទី២ ខែតុលា ដើម្បីឆ្លើយតបនឹងសេចក្ដីរាយការណ៍ព័ត៌មាននានា រួមទាំងកាសែតអាម៉េរិក The New York Times ដែលថា ចិន បានផ្តល់គ្រាប់រ៉ុក្កែតឱ្យកម្ពុជា នៅប៉ុន្មានសប្តាហ៍មុនទាហានថៃ បញ្ឆេះភ្លើងងសង្គ្រាមចូលឈ្លានពានកម្ពុជា រយៈពេល៥ថ្ងៃចន្លោះពីថ្ងៃទី២៤-២៨ ខែកក្កដា ឆ្នាំ២០២៥។ ស្ថានទូតចិន បានសង្កត់ធ្ងន់ថា ប្រទេសចិន កំពុងធ្វើការដើម្បីបន្ធូរបន្ថយស្ថានការណ៍តានតឹងនៅព្រំដែនកម្ពុជា-ថៃ ក្នុងនាមប្រទេសជាមិត្តរបស់ប្រទេសទាំងពីរ។

សូមបញ្ជាក់ថានាយករដ្ឋមន្ត្រីថៃ លោក អនុទីន ឆានវីរៈគុល បានយោងលើការចុះផ្សាយរបស់កាសែតអាម៉េរិក The New York Times មកចោទប្រកាន់ថា ប្រទេសចិន បានផ្គត់ផ្គង់សព្វាវុធដល់កងទ័ពកម្ពុជា ហើយនៅពេលសួរថា តើភាគីកម្ពុជា បានច្រានចោលការចុះផ្សាយនេះដែរឬទេ លោក អនុទីន បានឆ្លើយថា លោកបានដឹងពីសមត្ថភាពរបស់កងកម្លាំងដែលថៃ កំពុងឃ្លាំមើល ហើយថៃ បានត្រៀមខ្លួនរួចជានិច្ចក្នុងការទប់ទល់ជាមួយកងកម្លាំងកម្ពុជា។ នាយករដ្ឋមន្ត្រីរូបនេះអះអាងថា រដ្ឋាភិបាលកម្ពុជា បានលៃកញ្ចប់ថវិកា និងការគាំទ្រសម្រាប់ការពារជាតិ អំឡុងពេលមានភាពតានតឹងជាមួយប្រទេសថៃ រួចហើយផងដែរ។

ការលើកឡើងបែបនេះរបស់លោក អនុទីន ឆានវីរៈគុល បានធ្វើឱ្យស្ថានទូតចិន មានប្រតិកម្មភ្លាមៗ ហើយបានចេញសេចក្ដីថ្លែងការណ៍ច្រានចោលថា វាជាព័ត៌មានមិនពិត។ ជាមួយគ្នានេះរដ្ឋមន្ត្រីការបរទេសថ្មីរបស់ថៃ លោក ស៊ីហាសាក់ ភួងកេតកែវ (Sihasak Phuangketkeow) ក៏បាននិយាយដែរថា ការចុះផ្សាយរបស់កាសែត The New York Times ពាក់ព័ន្ធនឹងរឿងចិនផ្គត់ផ្គង់សព្វាវុធដល់កម្ពុជា គឺផ្អែកលើរបាយការណ៍ចាស់ៗប៉ុណ្ណោះ។

រដ្ឋមន្ត្រីការបរទេសថ្មីរបស់ថៃ បាននិយាយសម្រាលទាក់ទិនការចុះផ្សាយនេះថា ការលក់ ឬ ការផ្តល់សព្វាវុធសម្រាប់ការពារជាតិ គឺជាការអនុវត្តទូទៅក្នុងចំណោមប្រទេសជាច្រើន ពោលគឺវាគ្មានអ្វីចម្លែកនោះទេ។ ទោះជាយ៉ាងណារហូតមកទល់ពេលនេះភាគីកម្ពុជា មិនទាន់បានចេញមុខឆ្លើយតប ឬច្រានចោលព័ត៌មានដែលថា ចិន ផ្គត់ផ្គង់សព្វាវុធដល់កម្ពុជា នៅឡើយទេ៕

ដោយ: តែម សុខុម