តើតម្លៃសម្ភារៈសំណង់នៅកម្ពុជា មានការប្រែប្រួលយ៉ាងណាក្រោយថៃ បិទច្រកព្រំដែន?

លោក ឃូ សុខឡៃ អ្នកគ្រប់គ្រងទូទៅរបស់សាជីវកម្ម ពិស្ណុការ កត់សម្គាល់ឃើញថា មកទល់ពេលនេះ តម្លៃសម្ភារៈសំណង់មិនមានអ្វីប្រែប្រួលគួរឱ្យកត់សម្គាល់នោះទេ ខណៈសម្ភារៈសំខាន់ៗត្រូវបានប្រើប្រាស់វត្ថុធាតុដើម ដែលមាននៅក្នុងស្រុក និងមួយចំនួនទៀតត្រូវបាននាំចូលពីប្រទេសផ្សេងក្រៅពីប្រទេសថៃ។ តែយ៉ាងណាអ្នកជំនាញរូបនេះ លើកឡើងថា ប្រសិនបើស្ថានភាពនៃភាពតានតឹងរវាងកម្ពុជា និងថៃ នៅបន្តអូសបន្លាយពេលយូរនោះនឹងអាចមានផលប៉ះពាល់ខ្លះដែរ ដោយសារសម្ភារៈសំណង់មួយចំនួនត្រូវបាននាំចូលពីថៃ។ នៅក្នុងស្ថានភាពមិនប្រាកដប្រជានេះ លោក ឃូ សុខឡៃ ជឿជាក់ថា ប្រសិនបើភាពតានតឹងនៅបន្តអូសបន្លាយទៀតនោះអ្នកប្រើប្រាស់នៅកម្ពុជា នឹងជ្រើសរើសយកផលិតផលពីបណ្ដាប្រទេសផ្សេងមកជំនួសសម្ភារៈសំណង់របស់ថៃ។

​ដោយឡែកអ្នកគ្រប់គ្រងដេប៉ូគ្រឿងសំណង់ គង់ ទី នៅក្រុងប៉ោយប៉ែត ខេត្តបន្ទាយមានជ័យ បានគូសបញ្ជាក់ថា មកទល់ពេលនេះ សកម្មភាពសាងសង់នៅក្នុងខេត្តនេះ នៅតែមានដំណើរការជាធម្មតា ខណៈតម្លៃគ្រឿងសំណង់ក៏មិនមានការឡើងថ្លៃគួរឱ្យកត់សម្គាល់នោះដែរ។ បើតាមអ្នកលក់គ្រឿងសំណង់រូបនេះ ការបិទច្រកទ្វារព្រំដែនរបស់ភាគីថៃ មិនមានផលប៉ះពាល់ធ្ងន់ធ្ងរដល់ការសាងសង់នោះទេ ដោយសារតែសម្ភារៈសំណង់ភាគច្រើនត្រូវបានប្រើប្រាស់ផលិតផលក្នុងស្រុក និងមួយចំនួនទៀតនាំចូលពីប្រទេសវៀតណាម ជាដើម។

បើយោងតាមទិន្នន័យពីអគ្គនាយកដ្ឋានគយ និងរដ្ឋាករកម្ពុជា នៅក្នុងរយៈពេល៥ខែ ឆ្នាំ២០២៥ កម្ពុជា បាននាំចូលដែក និងដែកថែបមានទំហំទឹកប្រាក់ប្រមាណ៣៨០លានដុល្លារកើនឡើងជិត៦០% បើធៀបនឹងរយៈពេលដូចគ្នាកាលពីឆ្នាំ២០២៤។ ដោយឡែក នៅពេញមួយឆ្នាំ២០២៤ កន្លងទៅ ការនាំចូលដែក និងដែកថែបមានទំហំទឹកប្រាក់៦៣១លានដុល្លារមានការកើនឡើងជិត៧០% បើធៀបនឹងរយៈពេលដូចគ្នាកាលពីឆ្នាំ២០២៣៕

អត្ថបទ៖ បូ ដូឡា​