ឯកឧត្តម ហេង សុខគង់ រដ្ឋលេខាធិការ និងជាអ្នកនាំពាក្យក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ យល់ឃើញថា ការលើកលែងពន្ធលើការនាំចូលរថយន្តពីអាម៉េរិកមកកម្ពុជា នឹងមិនធ្វើឱ្យប៉ះពាល់ធ្ងន់ធ្ងរដល់ទីផ្សាររថយន្តនៅកម្ពុជានោះទេ ដោយសារការយកពន្ធនានា ដែលច្បាប់បានកំណត់នៅរក្សាដដែល។ ការណ៍នេះ ត្រូវបានមន្រ្តីជាន់ខ្ពស់រូបនេះគូសបញ្ជាក់ថា តម្លៃនាំចូលរថយន្តនៅតែខ្ពស់ជាងតម្លៃរថយន្ត ដែលផលិតនៅក្នុងស្រុក ដែលវានឹងធានាបាននូវការប្រកួតប្រជែងសម្រាប់រថយន្តដែលផលិតនៅក្នុងស្រុកផងដែរ។
ជាមួយគ្នានេះ លោក សេក សុជាតិ អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវយល់ឃើញថា ការបញ្ចុះពន្ធមកនៅ ០% លើការនាំចូលរថយន្តពីអាម៉េរិកទំនងជាពុំមានផលប៉ះពាល់ធ្ងន់ធ្ងរដល់ក្រុមហ៊ុនដំឡើងរថយន្ត និងទីផ្សារលក់រថយន្តនៅកម្ពុជា នោះទេ ដោយសារតែគោលការណ៍យកពន្ធនានា នៅរក្សាដដែល និងម្យ៉ាងទៀតរដ្ឋាភិបាលនៅបន្តផ្ដល់ការអនុគ្រោះពន្ធពិសេសដល់បណ្ដាក្រុមហ៊ុន ដែលមកវិនិយោគនៅកម្ពុជា។
បើតាមឯកឧត្ដមឧបនាយករដ្ឋមន្ត្រី ស៊ុន ចាន់ថុល អនុប្រធានទី១នៃក្រុមប្រឹក្សាអភិវឌ្ឍន៍កម្ពុជា រាល់មុខទំនិញជាង១ម៉ឺនបន្ទាត់ពន្ធរបស់សហរដ្ឋអាម៉េរិក ដែលនាំចូលមកកម្ពុជាស្ថិតក្នុងអត្រាពន្ធ ០% ការអត្រាពន្ធនានាក្រៅពីពន្ធគយនៅរក្សាដដែល។ ឯកឧត្ដមឧបនាយករដ្ឋមន្ត្រី ស៊ុន ចាន់ថុល ជឿជាក់ថា រថយន្តដែលដំឡើងនៅកម្ពុជានឹងមានតម្លៃទាបជាងរថយន្តនាំចូលពីបរទេស។
សូមបញ្ជាក់ថា ប្រធានាធិបតីសហរដ្ឋអាម៉េរិក លោក ដូណាល់ ត្រាំ បានសម្រេចយកពន្ធគយបដិការ១៩% លើទំនិញកម្ពុជា ដែលនាំចូលទៅសហរដ្ឋអាម៉េរិក ហើយអត្រាពន្ធនេះនឹងចូលជាធរមានចាប់ពីថ្ងទី១ ខែសីហា តទៅ។ អត្រាពន្ធគយបដិការ១៩% របស់អាម៉េរិក ត្រូវបានថ្នាក់ដឹកនាំរាជរដ្ឋាភិបាលកម្ពុជា ជឿជាក់ថា នឹងជួយឱ្យកម្ពុជា អាចប្រកួតប្រជែងជាមួយប្រទេសជិតខាងបានទាំងអស់ និងអាចថែរក្សាបាននូវរោងចក្រដែលមានស្រាប់ និងពង្រីករោងចក្រថ្មីៗបន្ថែមទៀតផងដែរ៕
អត្ថបទ៖ បូ ដូឡា
