លោក ត្រាំ ព្រមានវាយកម្ទេចរោងចក្រថាមពលអ៊ីរ៉ង់ឱ្យក្លាយជាផេះផង់ បើមិនបើកច្រកសមុទ្រហ័រម៉ូសក្នុងរយៈពេល៤៨ម៉ោង

យោងតាមទីភ្នាក់ងារព័ត៌មាន Reuters លោក ដូណាល់ ត្រាំ បានសរសេរសារព្រមានខ្លាំងៗនៅលើបណ្តាញសង្គមថា ប្រសិនបើអ៊ីរ៉ង់នៅតែរឹងរូសមិនបើកច្រកសមុទ្រ Hormuz និងមិនឈប់គំរាមកំហែងដល់នាវាពាណិជ្ជកម្មក្នុងរយៈពេល៤៨ម៉ោងទេ អាម៉េរិកនឹងកម្ទេចរោងចក្រថាមពលទាំងអស់របស់អ៊ីរ៉ង់ ដោយចាប់ផ្តើមពីរោងចក្រធំៗមុនគេ។

ការសម្រេចចិត្តបិទច្រកសមុទ្រ Hormuz របស់អ៊ីរ៉ង់ បានធ្វើឱ្យប៉ះពាល់ដល់ផ្លូវដឹកជញ្ជូនថាមពលដ៏សំខាន់ ដែលស្មើនឹង១ភាគ៥ នៃតម្រូវការសកលលោក។ វិបត្តិនេះបានរុញច្រានឱ្យតម្លៃប្រេងនៅអឺរ៉ុបហក់ឡើងដល់៣៥% ត្រឹមតែក្នុងមួយសប្តាហ៍ប៉ុណ្ណោះ ដែលបង្កជាក្តីបារម្ភយ៉ាងខ្លាំងអំពីវិបត្តិសេដ្ឋកិច្ចពិភពលោក។

ខណៈសង្គ្រាមឈានចូលដល់សប្តាហ៍ទី៤ សញ្ញាដ៏ច្របូកច្របល់ពីរដ្ឋបាលលោក ត្រាំ បានធ្វើឱ្យសម្ព័ន្ធមិត្តអន្តរជាតិមានការរារែកក្នុងការឆ្លើយតប។ ទោះជាយ៉ាងណា ជម្រើសចុងក្រោយនេះបានបង្ហាញយ៉ាងច្បាស់ថា កងម៉ារីន និងកងទ័ពជើងគោកអាម៉េរិកកំពុងស្ថិតក្នុងស្ថានភាពត្រៀមលក្ខណៈរួចរាល់ ដើម្បីបើកការវាយប្រហារតាមបញ្ជារបស់មេបញ្ជាការកំពូលគ្រប់វិនាទី៕

អត្ថបទៈ សួន ឡង់ទី. រូបភាពៈ ឯកសារបរទេស