អ្វីដែលជាការកត់សម្គាល់កាលពីចុងខែមិថុនា កន្លងទៅនេះ សមាជិកដ៏មានឥទ្ធិពលចំនួន២៤រូបនៃបក្សកុម្មុយនីស្តចិន ជួបប្រជុំគ្នា ដើម្បីពិភាក្សាលើបញ្ហាផ្សេងៗ និងការកែសម្រួលគណៈកម្មាធិការកណ្តាលបក្សកុម្មុយនីស្តចិន។
លោក ស៊ី ជីនភីង ដែលគេចាត់ទុកជាបុរសខ្លាំងមួយរបស់ចិន បន្ទាប់ពីលោក ម៉ៅ សេទុង ត្រូវបានគេរំពឹងថា កំពុងគិតគូរៀបចំការផ្ទេរអំណាចរបស់លោកឱ្យមន្ត្រីជួរមុខកំពូលនៃបក្សកុម្មុយនីស្តចិន ក្រោយលោកឡើងកាន់អំណាចអស់រយៈពេលជាង១២ឆ្នាំកន្លងមកនេះ។ នេះបើយោងអត្ថបទវិភាគមួយ ដែលត្រូវបានចុះផ្សាយដោយសារព័ត៌មាន The Economic Time។ អត្ថបទដដែលនេះ បានវាយតម្លៃថា លោក ស៊ី ទំនងជាអាចប្រើវិធីសាស្ត្រផ្ទេរអំណាច ឬអាចពង្រីកតួនាទីរបស់លោកនៅក្នុងបក្សក្រោយលោកប្រកាសចូលនិវត្ត។
ការរំពឹងទុកពីការផ្លាស់ប្តូរអំណាចរបស់បុរសខ្លាំងរដ្ឋចិន រូបនេះ បានកើតមានឡើងបន្ទាប់ពីទីភ្នាក់ងារសារព័ត៌មាន ស៊ីនហួរ កាលពីពេលថ្មីៗនេះ បានរាយការណ៍ថា ការិយាល័យនយោបាយ ដែលមានសមាជិក២៤រូប ដ៏មានឥទ្ធិពលនៃបក្សកុម្មុយនីស្តចិន ដែលកំពុងកាន់អំណាចបានរៀបចំនូវកិច្ចប្រជុំមួយកាលពីថ្ងៃទី៣០ ខែមិថុនា កន្លងទៅថ្មីៗនេះ ក្រោមការដឹកនាំដោយផ្ទាល់ពីលោក ស៊ី។ កិច្ចប្រជុំនេះ ត្រូវបានគេដឹងថា ខ្លឹមសារសំខាន់ដែលត្រូវបានលើកយកមកជជែកគ្នាពាក់ព័ន្ធការពង្រឹងបទប្បញ្ញត្តិស្តង់ដាលើការបង្កើត ទំនួលខុសត្រូវ និងប្រតិបត្តិការនៃស្ថាប័នធ្វើសេចក្តីសម្រេចចិត្ត និងការសម្របសម្រួលរបស់គណៈកម្មាធិការកណ្តាលរបស់គណបក្ស។
អត្ថបទគួរអាន
ពាក់ព័ន្ធព័ត៌មាននេះ សារព័ត៌មាន South China Morning Post ដែលមានមូលដ្ឋាននៅទីក្រុងហុងកុង កាលពីថ្ងៃអាទិត្យ បានចុះផ្សាយដោយដកស្រង់សម្តីអ្នកវិភាគមួយរូបថា ច្បាប់អាចត្រូវបានបង្កើតឡើងដើម្បីធានាការគ្រប់គ្រងស្ថានការណ៍នៅក្នុងប្រទេសចិន ព្រោះអាចនឹងមានការផ្លាស់ប្តូរអំណាចណាមួយកើតមានឡើង។ ការសន្និដ្ឋានបែបនេះ ធ្វើឡើងក្រោយលោកស៊ី អវត្តមានក្នុងកិច្ចប្រជុំកំពូល BRICS ដែលរៀបចំនៅទីក្រុង Rio de Janeiro ប្រទេសប្រេស៊ីល។ នេះជាលើកទីមួយហើយ ដែលលោក ស៊ី បានអវត្តមានក្នុងកិច្ចប្រជុំកំពូលនៃក្រុមប្រទេសដែលមានសេដ្ឋកិច្ចកំពុងរីកចម្រើននេះ ដោយលោកបញ្ចូនលោក លី ឈាង ឱ្យចូលរួមជំនួស។
ការរំពឹងមានការផ្លាស់ប្តូរអំណាចរបស់លោក ស៊ី ធ្វើឡើងចំពេលដែលសង្រ្គាមពន្ធគយរបស់ប្រធានាធិបតីអាម៉េរិក ដូណាល់ ត្រាំ កំពុងរំខានដល់ការនាំចេញរបស់ចិន ក្នុងទំហំរហូតដល់៤៤០ពាន់លានដុល្លារទៅអាម៉េរិក ស្របពេលសេដ្ឋកិច្ចចិន កំពុងប្រឈមមុខជាមួយកំណើនធ្លាក់ចុះដោយសារការបន្តធ្លាក់ចុះ និងការដួលរលំនៃទីផ្សារលំនៅឋាន ដែលជាកត្តាចម្បងក្នុងការជួយជំរុញកំណើនសេដ្ឋកិច្ចចិន។
អ្នកវិភាគនិយាយថា ផែនការរបស់លោក ស៊ី ក្នុងការបន្តកាន់អំណាច ឬចែករំលែកអំណាចត្រូវបានគេរំពឹងថា នឹងត្រូវប្រកាសនៅអំឡុងពេលសមាជ៥ឆ្នាំម្តងរបស់គណបក្សកុម្មុយនីស្តចិន ដែលនឹងប្រព្រឹត្តទៅនៅឆ្នាំ២០២៧ ជាពេលដែលលោក ស៊ី ត្រូវបញ្ចប់អាណត្តិទី៣របស់លោក៕
ដោយៈ សរ សុជាតិ
