សារព័ត៌មាន BBC បានរាយការណ៍ថា លោក ដូណាល់ ត្រាំ នឹងទៅបំពេញទស្សនកិច្ចនៅប្រទេសចិន បន្ទាប់ពីលោកបានសន្ទនាគ្នាជាមួយមេដឹកនាំចិនតាមទូរសព្ទជាលើកដំបូងកាលពីថ្ងៃទី៥ ខែមិថុនា។ បើតាមការអះអាងរបស់លោក ត្រាំ ដំណើរទស្សនកិច្ចទៅចិននេះធ្វើឡើងតបតាមការអញ្ជើញរបស់លោក ស៊ី ជីនពីង ប្រធានាធិបតីចិន ហើយលោកក៏បានអញ្ជើញលោក ស៊ី ឱ្យមកបំពេញទស្សនិច្ចនៅអាម៉េរិកវិញផងដែរ។ តែយ៉ាងណា លោក មិនទាន់បានបញ្ជាក់ពីពេលវេលា នៃដំណើរទស្សនកិច្ចនេះនៅឡើយទេ។
លោក ត្រាំ បានសរសេរនៅលើប្រព័ន្ធផ្សព្វផ្សាយសង្គមថា ការសន្ទនារយៈពេលមួយម៉ោងកន្លះជាមួយលោក ស៊ី គឺផ្តោតជាចម្បងលើបញ្ហាពាណិជ្ជកម្ម ដែលកំពុងមានភាពតានតឹង ដែលធ្វើឱ្យមានការសន្និដ្ឋានជាវិជ្ជមានថា ជម្លោះពាណិជ្ជកម្មរវាងប្រទេសទាំងពីរ ដែលបានឡើងកម្តៅខ្លាំងនៅមួយរយៈចុងក្រោយនឹងអាចមានភាពធូរស្បើយមកវិញ។
ទោះបីជំនួបពិភាក្សាតាមទូរសព្ទរវាងមេដឹកនាំទាំងពីរកាលពីថ្ងៃទី៥ មិថុនា មិនមានលទ្ធផលជាដុំកំភួនក៏ពិតមែន ប៉ុន្តែអ្នកវិភាគនៅតែបង្ហាញទស្សនៈសុទិដ្ឋិនិយម។ អ្នកវិភាគបានលើកឡើងថា ការអញ្ជើញគ្នាទៅវិញទៅមកនេះហាក់ដូចជាបង្ហាញសញ្ញាដ៏វិជ្ជមានមួយ ដែលបញ្ជាក់ឱ្យឃើញថា មេដឹកនាំពិភពលោកទាំងពីរបានមើលឃើញពីផលប៉ះពាល់នៃការប៉ះទង្គិចគ្នារវាងបងធំទី១ និងបងធំទី២នៅលើពិភពលោក។
ប្រសិនបើលោក ត្រាំ ទៅបំពេញទស្សនកិច្ចនៅចិន វានឹងក្លាយជាប្រវត្តិសាស្រ្តថ្មី បន្ទាប់ពី លោក បានដឹកដៃស្រ្តីទីមួយរបស់លោកគឺលោកស្រី មេឡានៀ ត្រាំ ( Melania Trump) ទៅទីក្រុងប៉េកាំងកាលពីខែវិច្ឆិកា ឆ្នាំ២០១៧ នៅពេលលោកដឹកនាំសេតវិមានអាណត្តិទី១៕
ដោយៈ សរ សុជាតិ
