តើឧស្សាហកម្មផលិតអាគុយរថយន្តអគ្គីសនីនៅអាស៊ានអាចកាត់ផ្តាច់ការពឹងផ្អែកលើចិនបានទេ?

ឧស្សាហកម្មផលិតអាគុយរថយន្តអគ្គីសនីរបស់ឥណ្ឌូនេស៊ី ​កំពុងពឹងផ្អែកកាន់តែខ្លាំងឡើងលើក្រុមហ៊ុនចិន ទាំងបច្ចេកទេស និងធនធាន ខណៈអ្នកវិនិយោគផ្សេងទៀតបានដកខ្លួនដូចជាក្រុមហ៊ុន LG Energy Solution របស់កូរ៉េខាងត្បូង ជាដើម។ ក្រុមហ៊ុននេះបានប្រកាសកាលពីពេលថ្មីៗថា ខ្លួននឹងដកគម្រោងវិនិយោគ ដែលមានតម្លៃ ៧,៧ ពាន់លានដុល្លារចេញពីប្រទេសឥណ្ឌូណេស៊ី។ ក្រៅពីនោះ ក្រុមហ៊ុន BASF ដែលជាក្រុមហ៊ុនចម្រុះជាតិសាសន៍របស់អឺរ៉ុប និងក្រុមហ៊ុនរុករករ៉ែរបស់បារាំង Eramet ក៏បានលុបចោលគម្រោងនេះផងដែរ។

ក្រោយក្រុមហ៊ុនទាំងនេះ បានដកខ្លួនកាលពីចុងខែមិថុនា កន្លងទៅ ឥណ្ឌូនេស៊ី បានសហការជាមួយក្រុមហ៊ុនចិន CATL លើគម្រោងសាងសង់រោងចក្រផលិតអាគុយរថយន្តអគ្គីសនីដ៏ធំមួយ ដែលមានតម្លៃវិនិយោគសរុបប្រមាណ ៥,៩ ពាន់លានដុល្លារ។ មកដល់ពេលនេះឧស្សាហកម្មផលិតអាគុយរថយន្តអគ្គីសនីនៅឥណ្ឌូនេស៊ី មិនត្រឹមតែប្រឈមមុខនឹងបញ្ហាទុនប៉ុណ្ណោះទេ ថែមទាំងជួបបញ្ហាផលប៉ះពាល់បរិស្ថាន បញ្ហាថាមពល និងបញ្ហាធនធានមនុស្សផងដែរ។

ពាក់ព័ន្ធបញ្ហាថាមពល ឥណ្ឌូនេស៊ី កំពុងពង្រឹងផលិតកម្មថាមពលអគ្គីសនី ដោយតាមផែនការឥណ្ឌូនេស៊ី ប្តេជ្ញាផលិតថាមពលឲ្យបាន ៦,៩ ជីហ្គាវ៉ាត់ នៅក្នុងឆ្នាំ២០២៦ ដើម្បីឆ្លើយតបនឹងតម្រូវថាមពលសម្រាប់ការប្រើប្រាស់រថយន្តអគ្គីសនីប្រមាណជា១សែនគ្រឿង។ មកដល់ពេលបច្ចុប្បន្ននេះ ក្រុមហ៊ុនចិន គ្រប់គ្រងប្រហែល ៧៥% នៃរ៉ែនីកែលនៅក្នុងប្រទេសឥណ្ឌូនេស៊ី៕

ដោយៈ សរ សុជាតិ