ក្រុមប្រឹក្សាអភិវឌ្ឍន៍កម្ពុជា (CDC) កាលពីខែមករា បានអនុម័តគម្រោងអភិវឌ្ឍស្ថានីយផលិតថាមពលអគ្គិសនីដើរដោយខ្យល់ ដែលមានអានុភាព១៥០មេហ្កាវ៉ាត់នៅក្រុងសែនមនោរម្យ ខេត្តមណ្ឌលគិរី។ តែយ៉ាងណា CDC មិនបានបញ្ជាក់លម្អិតទេថា គម្រោងដែលមានទំហំវិនិយោគប្រមាណ២០០លានដុល្លារនេះគ្រោងបើកការដ្ឋានសាងសង់នៅពេលណា និងគ្រោងបញ្ចប់ពេលណានោះទេ។ យ៉ាងណាមិនបើតាមការបញ្ជាក់របស់អគ្គិសនីកម្ពុជា កាលពីពេលថ្មីៗ ក្នុងពេលឆាប់ៗខាងមុខនេះ កម្ពុជានឹងមានប្រភពអគ្គិសនីដើរដោយខ្យល់ចំនួន៦គម្រោង ដែលមានអានុភាពសរុបចំនួន៩០០មេហ្គាវ៉ាត់ នៅខេត្តមណ្ឌលគីរី ក្នុងនោះគ្រោងនឹងដាក់ឱ្យដំណើរការដណាក់កាលដំបូងទំហំ១៥០មេហ្គាវ៉ាត់ នៅក្នុងឆ្នាំ២០២៦ នេះ។
ជាមួយគ្នានេះ ថ្នាក់ដឹកនាំក្រសួងរ៉ែ និងថាមពល បានបញ្ជាក់កាលពីពេលថ្មីៗថា ក្រៅពីខេត្តមណ្ឌលគិរី តំបន់ភ្នំបូកគោ ក្នុងខេត្តកំពត ក៏ជាគោលដៅយុទ្ធសាស្ត្រសម្រាប់ការដំឡើងទួរប៊ីនខ្យល់សម្រាប់ផលិតអគ្គិសនីផងដែរ។ ឯកឧត្តមបានចាត់ទុកការពង្រីកវិសាលភាពថាមពលដើរដោយកម្លាំងខ្យល់នេះ គឺជាសក្ខីភាពនៃការប្ដេជ្ញាចិត្តរបស់កម្ពុជា ក្នុងការកាត់បន្ថយការបំភាយឧស្ម័នកាបូន ជំរុញសេដ្ឋកិច្ចបៃតង និងបង្កើនភាពទាក់ទាញដល់វិនិយោគិនអន្តរជាតិ ដែលចង់បានការប្រើប្រាស់ថាមពលស្អាតនៅក្នុងផលិតកម្ម ស្របពេលដែលរាជរដ្ឋាភិបាលកម្ពុជា បានដាក់ផែនការផលិតថាមពលស្អាតឱ្យបាន៧០% នៅត្រឹមឆ្នាំ២០៣០ ដើម្បីធានានិរន្តរភាពបរិស្ថាន ជំរុញសេដ្ឋកិច្ចបៃតង និងទាក់ទាញការវិនិយោគ។
លោកបណ្ឌិត គី សេរីវឌ្ឍន៍ អ្នកស្រាវជ្រាវសេដ្ឋកិច្ច និងជាប្រធានវិទ្យាស្ថានសិក្សាចិននៃរាជបណ្ឌិត្យសភាកម្ពុជា យល់ឃើញថា ទោះបីជាការបង្កើតស្ថានីយផលិតថាមពលអគ្គិសនីដើរដោយខ្យល់បានចូលរួមចំណែកជួយជំរុញការប្រើប្រាស់ថាមពលស្អាត និងជួយបំពេញបន្ថែមនូវប្រភពថាមពលរបស់កម្ពុជា ក៏ពិតមែន ប៉ុន្តែវាមិនបានចូលរួមកាត់បន្ថយតម្លៃអគ្គសនីនៅកម្ពុជា នោះទេ។
គួរបញ្ជាក់ផងដែរថា បច្ចុប្បន្នកម្ពុជា មានសមត្ថភាពផលិតថាមពលសរុបប្រមាណជាង៥,០០០មេហ្គាវ៉ាត់ ដែលក្នុងនោះថាមពលកកើតឡើងវិញរួមមានវារីអគ្គិសនី ថាមពលពន្លឺព្រះអាទិត្យ និងជីវម៉ាស បានរួមចំណែកប្រមាណ៦០% ទៅហើយ។ ការបន្ថែមថាមពលដើរដោយខ្យល់នាពេលឆាប់ៗនេះ នឹងធ្វើឱ្យកម្ពុជា ក្លាយជាប្រទេសឈានមុខគេមួយក្នុងតំបន់ក្នុងការប្រើប្រាស់ប្រភពថាមពលចម្រុះប្រកបដោយនិរន្តរភាពបរិស្ថាន៕
