លោក អេឡន ម៉ាស់ រអិលធ្លាក់ចេញពីតំណែងជាអ្នកមានបំផុតនៅលើពិភពលោកអស់៣ម៉ោង

សារព័ត៌មាន CNN បានរាយការណ៍ថា ទ្រព្យសម្បត្តិរបស់មហាសេដ្ឋី ឡារី អេលីសុន បានកើនឡើង៨៩ពាន់លានដុល្លារ ដែលធ្វើឱ្យទ្រព្យសម្បត្តិសរុបរបស់លោកកើនដល់ជាង៣៨៣ពាន់លានដុល្លារ កាលពីថ្ងៃទី១០ ខែកញ្ញា។ តាមរយៈទ្រព្យសម្បត្តិនេះបានជួយឱ្យស្ថាបនិកក្រុមហ៊ុន Software Oracle Corporation នេះទម្លាក់មហាសេដ្ឋី អេឡុន ម៉ាស់ ម្ចាស់ក្រុមផលិតរថយន្តអគ្គិសនី Tesla ក្លាយជាអ្នកមានទ្រព្យសម្បត្តិច្រើនជាងគេបំផុតនៅលើពិភពលោក។

តែយ៉ាងណាកំពូលមហាសេដ្ឋីរូបនេះគ្រងតំណែងជាកំពូលមហាសេដ្ឋីមានបំផុតបានត្រឹមរយៈពេល៣ម៉ោងប៉ុណ្ណោះ ដោយលោក អេឡុន ម៉ាស់ បានឡើងមកគ្រងតំណែងនេះវិញ ក្រោយទ្រព្យសម្បត្តិរបស់កំពូលមហាសេដ្ឋីរូបនេះកើនឡើងលើសទ្រព្យសម្បត្តិរបស់លោក ឡារី ប្រមាណ១ពាន់លានដុល្លារនៅម៉ោងចុងក្រោយនៃការបិទការជួញដូរភាគហ៊ុនក្នុងថ្ងៃដដែល។

បច្ចុប្បន្នក្រុមហ៊ុន Software Oracle Corporation ត្រូវបានគេដឹងថា ជាក្រុមហ៊ុនដែលកំពុងគ្រប់គ្រងការផ្គត់ផ្គង់កម្មវិធីទិន្នន័យ និងថាមពលមានទំហំរហូតដល់ទៅ៤,៥ជីហ្គាវ៉ាត់ ដល់ក្រុមហ៊ុន OpenAI៕

ដោយៈ សរ សុជាតិ