ប្រធានធនាគារកណ្តាលអឺរ៉ុប គ្រោងលាលែងពីតំណែងមុនអាណត្តិ ដើម្បីបើកផ្លូវឱ្យលោក ម៉ាក្រុង ជ្រើសរើសអ្នកបន្តវេនថ្មី

លោកស្រី គ្រីស្ទីន ឡាហ្គាត កំពុងពិចារណាចាកចេញពីតំណែងជាប្រធានធនាគារកណ្ដាលអឺរ៉ុបមុនកាលកំណត់ ពោលគឺមុនការបោះឆ្នោតជ្រើសរើសប្រធានាធិបតីបារាំង នៅឆ្នាំក្រោយ​។ គោលបំណងសំខាន់នៃការចាកចេញនេះត្រូវបានគេវាយតម្លៃថា ដើម្បីផ្ដល់ឱកាសឱ្យប្រធានាធិបតីបារាំង លោក អេម៉ានូអែល ម៉ាក្រុង មានសិទ្ធិអំណាចពេញលេញក្នុងការជ្រើសរើស និងតែងតាំងអ្នកស្នងតំណែងរបស់លោកស្រី ឱ្យបានរួចរាល់ ក្រោយមានការបារម្ភពីការឈ្នះឆ្នោតរបស់គណបក្សស្តាំនិយម។

តាមផែនការអាណត្តិផ្លូវការរបស់លោកស្រី ឡាហ្គាត នៅក្នុងស្ថាប័នហិរញ្ញវត្ថុដ៏មានឥទ្ធិពលនៅតំបន់អឺរ៉ុបនេះនឹងត្រូវបញ្ចប់នៅខែតុលា ឆ្នាំ២០២៧។ ប៉ុន្តែប្រសិនបើគណបក្សស្តាំនិយមទទួលបានជ័យជម្នះក្នុងការបោះឆ្នោតនៅដើមឆ្នាំ២០២៧ នោះវាអាចនឹងធ្វើឱ្យដំណើរការជ្រើសរើសប្រធានថ្មី ធ្លាក់ក្នុងភាពទាល់ច្រក ឬមានការប្រទាញប្រទង់ផ្នែកនយោបាយខ្លាំង។

ជុំវិញបញ្ហានេះលោក ហ្សកដង់ បាដេឡា (Jordan Bardella) ប្រធានគណបក្សស្តាំនិយមបារាំងបានចេញមុខរិះគន់លោក ម៉ាក្រុង ថា កំពុងព្យាយាមរៀបចំយន្តការរក្សាអំណាច បើទោះបីជាត្រូវចាកចេញពីតំណែងប្រធានាធិបតី ក៏ដោយ។

គួរបញ្ជាក់ថា បារាំងជាមហាអំណាចសេដ្ឋកិច្ចធំបំផុតទីពីរនៅតំបន់អឺរ៉ុប ហើយជាទម្លាប់គ្មានបេក្ខភាពណាម្នាក់អាចឡើងកាន់តំណែងជាប្រធានធនាគារកណ្ដាលអឺរ៉ុប បានឡើយ ប្រសិនបើគ្មានការយល់ព្រមពីទីក្រុងប៉ារីស។ ប្រភពផ្ទៃក្នុងបានបង្ហើបឱ្យដឹងថា ទោះបីលោកស្រី ឡាហ្គាត មិនទាន់សម្រេចចិត្តជាផ្លូវការ ១០០%ក៏ដោយ ប៉ុន្តែលោកស្រី ចង់ឱ្យលោក ម៉ាក្រុង និងអធិការបតីអាល្លឺម៉ង់បច្ចុប្បន្ន ជាអ្នកសម្រេចលើបេក្ខភាពអ្នកស្នងតំណែងលោកស្រី ស្របពេលលោក ម៉ាក្រុង មិនអាចឈរឈ្មោះជាប្រធានាធិបតីអាណត្តិទី៣បានទៀតឡើយ៕

ដោយៈ សរ សុជាតិ