ក្រុមហ៊ុនអចលនទ្រព្យខ្នាតយក្សរបស់ចិន Evergrande ត្រូវបានលុបចេញពីផ្សារហ៊ុនហុងកុង

ភាគហ៊ុនរបស់ក្រុមហ៊ុនអចលនទ្រព្យខ្នាតយក្សរបស់ចិន Evergrande ដែលធ្លាប់មានការជួញដូរឈានដល់ជាង៥០ពាន់លានដុល្លារត្រូវបានលុបចេញពីបញ្ជីផ្សារហ៊ុនក្រុងហុងកុង ក្រោយក្រុមហ៊ុននេះបានក្ស័យធនជំពាក់បំណុលគេវ័ណ្ឌកមិនអាចរើខ្លួនរួច។ បើតាមការគូសបញ្ជាក់របស់លោក ដេន វ៉ាង (Dan Wang) នាយកក្រុមហ៊ុនប្រឹក្សាយោបល់អំពីហានិភ័យនយោបាយប្រចាំប្រទេសចិន Eurasia Group បន្ទាប់ពីត្រូវបានលុបឈ្មោះចេញ ក្រុមហ៊ុននេះមិនចូលរួមបោះផ្សាយជួញដូរភាគហ៊ុននៅក្នុងផ្សារហ៊ុននេះបានទៀតនោះទេ។

មុនជំពាក់បំណុលគេរុំកោះរហូតដល់៤៥ពាន់លានដុល្លារ ដោយសារការអូសបន្លាយនៃវិបត្តិអចលនទ្រព្យជាច្រើនឆ្នាំនៅក្នុងប្រទេសមហាអំណាចសេដ្ឋកិច្ចធំបំផុតទីពីររបស់ពិភពលោកមួយនេះ ក្រុមហ៊ុនខ្នាតយក្សនេះបានដើរតួនាទីយ៉ាងសំខាន់ក្នុងការរួមចំណែកជួយជំរុញកំណើនសេដ្ឋកិច្ចរបស់ប្រទេសចិន។

ស្ថាបនិក និងជាប្រធានក្រុមហ៊ុន Evergrande លោក ហួយ កាយ៉ាន (Hui Ka Yan) បានសាងភាពល្បីល្បាញពីការចាប់ផ្តើមដ៏លំបាកនៅទីជនបទក្រីក្រនៅប្រទេសចិន ដើម្បីឈរនៅលើកំពូលតារាងនៃទស្សនាវដ្ដី Forbes ជាអ្នកមានបំផុតនៅអាស៊ីក្នុងឆ្នាំ២០១៧ ជាមួយទ្រព្យសម្បត្តិប្រមាណ៤៥ពាន់លានដុល្លារ។

ប៉ុន្តែក្រុមហ៊ុននេះ ក៏បានដួលរលំកាលពីខែមីនា ឆ្នាំ២០២៤ បន្ទាប់ពីលោក ហួយ ត្រូវបានពិន័យប្រាក់ចំនួន៦,៥លានដុល្លារ និងត្រូវបានដកចេញពីទីផ្សារមូលបត្ររបស់ចិន ជារៀងរហូតដោយសារតែក្រុមហ៊ុននេះ បានបំប៉ោងប្រាក់ចំណូលឈានដល់៧៨ពាន់លានដុល្លារ៕

ដោយ៖ សុខ មង្គល