បើតាមការអះអាងរបស់ក្រុមកសិករ គិតត្រឹមថ្ងៃទី៥ ខែមិថុនា នេះ កម្រិតទឹកក្នុងអាងនេះមិនទាន់ស្រកចុះនៅឡើយទេ ដែលទាមទារឱ្យអាជ្ញាធរមានសមត្ថកិច្ច បើកទ្វារទឹកបង្ហូរទឹកចេញពីអាងនេះ ដើម្បីសង្គ្រោះដំណាំស្រូវរបស់ពួកគេ ដែលកំពុងរងការជន់លិច។
ក្រុមកសិករធ្វើស្រែ នៅភូមិត្រពាំងស្រង់ និងភូមិពោធិរោង ឃុំព្រះបាទជាន់ជុំ ស្រុកគិរីវង់ ខេត្តតាកែវ ដែលកំពុងរងការជន់លិចដោយសារជំនន់ទឹកភ្លៀងមួយចំនួន បានស្នើឱ្យក្រសួងស្ថាប័នពាក់ព័ន្ធជាពិសេសអាជ្ញាធរមានសមត្ថកិច្ចនៅក្នុងមូលដ្ឋានដែលពួកគេកំពុងរស់នៅ ជួយអន្តរាគមន៍តាមរយៈការបើកទ្វារទឹកបង្ហូរចេញពីអាងទឹកទន្លាប់ ដើម្បីជួយសង្គ្រោះស្រូវរបស់ពួកគេ។ ក្រុមកសិករបានអះអាងថា បើមិនមានការបើកទឹកជួយសង្គ្រោះឱ្យបានទាន់ពេលវេលាទេ នោះស្រូវរបស់ពួកគេ ក៏ដូចជាស្រូវរបស់ប្រជាកសិករដទៃទៀតជាច្រើនហិកតាអាចប្រឈមនឹងការខូចខាតជាក់ជាមិនខាន។ ក្រុមកសិករដដែលបានបន្តទៀតថា បច្ចុប្បន្នមានស្រូវមួយចំនួនបានរងការខូចខាតរួចទៅហើយ។
ជាមួយគ្នានេះ លោក នឹម សុផល មេភូមិពោធិរោង បានអះអាងថា ដំណាំស្រូវនៅមូលដ្ឋានរបស់លោកជាពិសេសស្រែនៅជាប់មាត់បឹងពិតរងការជន់លិចមួយចំនួនពិតប្រាកដមែន តែចំនួននេះតិចជាងស្រូវដែលបានរងការលន់លិចនៅមូលដ្ឋានភូមិត្រពាំងស្រង់។ តែយ៉ាងណាលោកមិនទាន់ដឹងទំហំស្រូវដែលរងការជន់លិចមានប៉ុន្មានហិកតានៅឡើយទេ។ តែយ៉ាងណាបើតាមការអះអាងរបស់មេភូមិរូបនេះ បច្ចុប្បន្នភាគីពាក់ព័ន្ធកំពុងជួយអន្តរាគមន៍លើបញ្ហានេះ ហើយបើគ្មានការប្រែប្រួលទេ អាជ្ញាធរស្រុកនឹងជួបប្រជុំជាមួយប្រជាពលរដ្ឋដែលរងផលប៉ះពាល់ ដើម្បីរកដំណោះស្រាយជុំវិញបញ្ហានេះក្នុងពេលឆាប់ៗខាងមុខនេះ។
ជុំវិញបញ្ហាស្រូវលិចទឹកនេះដែរ ឯកឧត្តម វ៉ី សំណាង អភិបាលខេត្តតាកែវ បានប្រាប់សារព័ត៌មានខេមបូណូមីស ដោយខ្លីថា ដំណាំស្រូវរបស់កសិករដែលរងការជន់លិចខាងលើ គឺបណ្តាលមកពីកត្តាធម្មជាតិ ហើយជាធម្មតានៅតំបន់នោះ៦ខែទឹក ៦ខែគោក។
ពាក់ព័ន្ធបញ្ហានេះដែរ សារព័ត៌មានខេមបូណូមីស មិនអាចទាក់ទងសុំការបញ្ជាក់ពីលោក ងួន ឌីណា អភិបាលស្រុកគិរីវង់ បាននោះទេ ដោយសារទូរសព្ទលោកខលអត់ចូល៕
