អ្នកជំនាញហិរញ្ញវត្ថុជំរុញឱ្យធនាគារកណ្តាលហ្វីលីពីនបញ្ចេញមាសលក់ ក្រោយរំពឹងតម្លៃមាសនឹងមានការធ្លាក់ចុះ

អ្នកបង្កើតគោលនយោបាយហិរញ្ញវត្ថុម្នាក់របស់ហ្វីលីពីនបានផ្តល់យោបល់ថា ធនាគារកណ្តាលហ្វីលីពីនគួរតែបញ្ចេញមាសក្នុងទុនបម្រុងជាមាសរបស់ខ្លួនលក់ខ្លះ ដើម្បីយកប្រាក់ចំណេញដោយសារតម្លៃមាសទំនងជាអាចធ្លាក់ចុះបន្ថែមទៀតពីកម្រិតបច្ចុប្បន្ន។ លោក បេនចាមីន ឌីអូកណូ ( Benjamin Diokno) សមាជិកក្រុមប្រឹក្សារូបិយវត្ថុ នៃធនាគារកណ្តាលហ្វីលីពីនបានឲ្យដឹងថា បច្ចុប្បន្នធនាគារកណ្តាលហ្វីលីពីនកំពុងថ្លឹងថ្លែងថា តើត្រូវបន្តទិសមាសដាក់ចូលក្នុងទុនបម្រុងបន្ថែមទៀត ឬក៏លក់ចេញ ដើម្បីយកប្រាក់ចំណេញ។ អ្នកជំនាញរូបនេះបានលើកឡើងក្នុងបទសម្ភាសន៍មួយកាលពីថ្ងៃចន្ទ នៅខាងក្រៅកិច្ចប្រជុំកំពូលពាណិជ្ជកម្មអាស៊ានថា បច្ចុប្បន្នធនាគារកណ្តាលហ្វីលីពីនអាចរក្សាទុនបម្រុងជាមាសលើសពីតម្រូវការប្រមាណ១៣%។

បច្ចុប្បន្នធនាគារកណ្តាលហ្វីលីពីនកំពុងគ្រប់គ្រងទុនបម្រុងជាមាសមានតម្លៃសរុបប្រមាណ១០៩ពាន់លានដុល្លារ ខណៈហ្វីលីពីនបានបង្កើនការទិញមាសចូលតាំងពីមួយតម្លឹងតម្លៃ២ពាន់៤រយដុល្លារ។ ស្ថិតក្នុងស្ថានភាពនេះ លោក ឌីអូកណូ បានលើកឡើងថា ធនាគារកណ្តាលហ្វីលីពីនគួរពិចារណាបញ្ចេញមាស ដែលជាទុនបម្រុងលើសខ្លះចេញ ដើម្បីលក់យកប្រាក់ចំណេញ នៅមុនពេលដែលតម្លៃមាសវាធ្លាក់ចុះបន្ថែមទៀត។

កាលពីថ្ងៃទី២០ ខែតុលា ឆ្នាំ២០២៥ តម្លៃមាសនៅហ្វីលីពីនមានតម្លៃ៥ពាន់២រយ៥០ដុល្លារក្នុងមួយតម្លឹង ដូច្នេះធនាគារកណ្តាលគួរលៃលក់មាសចេញខ្លះ ដើម្បីយកសាច់ប្រាក់តម្កល់នៅក្នុងប្រព័ន្ធធនាគារ មុនពេលតម្លៃមាសធ្លាក់ចុះបន្ថែមទៀត៕
ដោយៈ សរ សុជាតិ