ប្រទេសធំៗចំនួន៥ និងសហភាពអឺរ៉ុប ជំរុញឱ្យលោក ដូណាល់ ត្រាំ ឈប់ដាក់ពន្ធថ្មីៗលើការនាំចូលយន្តហោះពាណិជ្ជកម្ម

ក្រសួងពាណិជ្ជកម្មអាម៉េរិក បានឱ្យដឹងថា បណ្ដាក្រុមហ៊ុនអាកាសចរណ៍ និងក្រុមហ៊ុនផលិតយន្តហោះ ​កំពុងបញ្ចុះបញ្ចូលសុំឱ្យប្រធានាធិបតី ដូណាល់ ត្រាំ ស្តារឡើងវិញនូវរបបគ្មានពន្ធក្រោមកិច្ចព្រមព្រៀងយន្តហោះស៊ីវិលឆ្នាំ១៩៧៩ ដែលបានជួយឱ្យឧស្សាហកម្មផលិតយន្តហោះស៊ីវិលរបស់សហរដ្ឋអាម៉េរិក ទទួលបានអតិរេកពាណិជ្ជកម្មរហូតដល់ទៅ ៧៥ពាន់លានដុល្លារក្នុងមួយឆ្នាំៗ។

ក្រសួងពាណិជ្ជកម្មអាម៉េរិក បានឲ្យដឹងទៀតថា បណ្ដាក្រុមហ៊ុន ប្រទេសធំៗចំនួន៥ រួមមាន ចិន កាណាដា ជប៉ុន ម៉ិកស៊ិក ស្វីស និងសហភាពអឺរ៉ុប ដែលមានសមាជិក២៧ប្រទេសបានបង្ហាញការព្រួយបារម្ភអំពីផលប៉ះពាល់នៃពន្ធគយថ្មីៗដែលអាចកើតមាន។

សហភាពអឺរ៉ុប បានលើកឡើងថា ក្នុងនាមជាដៃគូពាណិជ្ជកម្មដែលអាចទុកចិត្តបាន សហភាពអឺរ៉ុប និងសហរដ្ឋអាម៉េរិក គួរតែពង្រឹងពាណិជ្ជកម្មរបស់ខ្លួនទាក់ទិននឹងយន្តហោះ និងគ្រឿងបន្លាស់យន្តហោះជាជាងការរារាំងតាមរយៈការរឹតបន្តឹងពាណិជ្ជកម្ម។ ទន្ទឹមនេះ សហភាពអឺរ៉ុប ក៏បានលើកឡើងដែរថា ខ្លួននឹងពិចារណាជម្រើសផ្សេងៗដើម្បីធានាបាននូវការប្រកួតប្រជែងដោយត្រឹមត្រូវ។

សូមបញ្ជាក់ថា លោក ដូណាល់ ត្រាំ បានដាក់ពន្ធគយ១០% រួចទៅហើយ លើយន្តហោះ និងគ្រឿងបន្លាស់យន្តហោះនាំចូលស្ទើរតែទាំងអស់៕

ដោយ: តែម សុខុម