អតីតរដ្ឋមន្ត្រីក្រសួងយុត្តិធម៌ចិនម្នាក់ ត្រូវបានកាត់ទោសឱ្យជាប់ពន្ធនាគារអស់មួយជីវិតពីបទពុករលួយ

​​ លោក តាំង យីជុន (Tang Yijun) វ័យ៦៤ឆ្នាំ គឺជាបុគ្គលដ៏មានឥទ្ធិពលមួយរូបក្នុងជួររដ្ឋាភិបាលចិន ដោយបានកាន់តំណែងជារដ្ឋមន្ត្រីក្រសួងយុត្តិធម៌របស់ចិនចាប់ពីឆ្នាំ២០២០ ដល់ឆ្នាំ២០២៣ និងបានកាន់តំណែងផ្សេងៗជាច្រើនទៀតដូចជាអភិបាលខេត្ត លៀវនីង (Liaoning) និងជាប្រធានបក្សកុម្មុយនីស្តចិនប្រចាំទីក្រុង នីងបូ (Ningbo)។ បើយោងសេចក្តីសម្រេចរបស់តុលាការចិន លោក តាំង បានទទួលប្រាក់សំណូកសរុបជិត២០លានដុល្លារអាម៉េរិក។ តុលាការបានសង្កត់ធ្ងន់ថា ទង្វើពុករលួយនេះបានបង្កឱ្យកើតមានការខូចខាតយ៉ាងធ្ងន់ធ្ងរបំផុតដល់ផលប្រយោជន៍របស់រដ្ឋ និងប្រជាជន។

ទោះជាយ៉ាងណា ការកាត់ទោសឱ្យជាប់ពន្ធនាគារអស់មួយជីវិតនេះ ត្រូវបានតុលាការបញ្ជាក់ថា ជាកម្រិតទោសដែលមានការយោគយល់ខ្លះហើយ ដោយសារលោក តាំង យីជុន បានសារភាពកំហុសក្រោយការចាប់ខ្លួន និងបានសហការយ៉ាងស្អិតរមួតជាមួយសមត្ថកិច្ចក្នុងដំណើរការស៊ើបអង្កេត៕

អត្ថបទៈ សួន ឡង់ទី. រូបភាពៈ ឯកសារបរទេស