តម្លៃមាសនៅលើទីផ្សារពិភពលោកនៅដើមសប្តាហ៍នេះ បានហក់ឡើងថ្លៃខ្ពស់បំផុតមិនធ្លាប់មានក្នុងរយៈពេលជាង១ខែកន្លងមកនេះ ក្រោយបណ្ដាវិនិយោគិនមានការព្រួយបារម្ភថា ភាពតានតឹងផ្នែកភូមិសាស្ត្រនយោបាយនៅលើពិភពលោក ជាពិសេសពន្ធគយបដិការដ៏ចម្រូងចម្រាសរបស់លោកដូណាល់ ត្រាំ អាចនឹងធ្វើឱ្យអត្រាអតិផរណាហក់ឡើង និងនាំឱ្យអត្រាការប្រាក់ធ្លាក់ចុះទាប។ ការធ្លាក់ថ្លៃនៃប្រាក់ដុល្លារអាម៉េរិក និងការធ្លាក់ចុះតម្លៃមូលបត្របំណុល ក៏ជាកត្តារួមចំណែកដ៏សំខាន់ដែលធ្វើឱ្យហាងឆេងមាសហក់ឡើងថ្លៃផងដែរ។
បើយោងតាមក្រុមហ៊ុនមូលបត្រ TD Securities បានឱ្យដឹងថា វិនិយោគិនធំៗកំពុងសម្រុកទិញចូលមាសជាថ្មីម្តងទៀត ដោយរំពឹងថា នឹងទទួលបានប្រាក់ចំណេញបន្ថែមទៀតដោយសារភាពតានតឹងផ្នែកពាណិជ្ជកម្មសកល ការបញ្ចុះអត្រាការប្រាក់ និងហានិភ័យអតិផរណា។
មន្ត្រីធនាគារកណ្តាលអាម៉េរិក មួយចំនួន បានបង្ហាញការគាំទ្ររួចមកហើយសម្រាប់ការបញ្ចុះអត្រាការប្រាក់ ប៉ុន្តែមន្ត្រីផ្សេងៗទៀតនៅតែមានការប្រុងប្រយ័ត្នខ្ពស់ ដោយព្រួយបារម្ភថា ពន្ធគយរបស់លោក ដូណាល់ ត្រាំ អាចជំរុញឱ្យអតិផរណាហក់ឡើងខ្ពស់។ ទន្ទឹមនឹងនេះ លោកត្រាំ ក៏កំពុងដាក់សម្ពាធលើធនាគារកណ្ដាលអាម៉េរិក និងពិចារណារើសបេក្ខភាពឲ្យជំនួសតំណែងប្រធានធនាគារកណ្ដាលអាម៉េរិក លោក Jerome Powell បន្ទាប់ពីអាណត្តិរបស់លោកត្រូវបញ្ចប់នៅក្នុងឆ្នាំ២០២៦ ខាងមុខ។
ងាកទៅមើលនៅអឺរ៉ុប ឯណោះវិញ ក្រុមមន្ត្រីសហភាពអឺរ៉ុប កំពុងត្រៀមខ្លួនជាមួយនឹងបញ្ហាពាណិជ្ជកម្មដែលអាចកើតមានជាមួយសហរដ្ឋអាម៉េរិក នៅមុនឱសានវាទអនុវត្តពន្ធគយថ្មីរបស់លោក ដូណាល់ ត្រាំ ចូលមកដល់នៅថ្ងៃទី១ ខែសីហា ដ៏ខ្លីខាងមុខ។
សូមបញ្ជាក់ថា ហាងឆេងមាសនៅលើទីផ្សារអន្តរជាតិ បានឡើងរហូតដល់ទៅជាង ២៥% រួចមកហើយនៅឆ្នាំ២០២៥ នេះ ខណៈដែលបណ្ដាវិនិយោគិនសម្រុកទិញចូលមាស ផ្លាទីន និង ប្រាក់ទុកជាការវិនិយោគដ៏មានសុវត្ថិភាព ក្នុងគ្រាដែលពិភពលោកកំពុងជ្រួលច្របល់៕
ដោយ: តែម សុខុម
