ឯកឧត្តម វង្សី វិស្សុត ស្នើឱ្យសាជីវកម្មហិរញ្ញវត្ថុអន្តរជាតិពង្រីកការវិនិយោគក្នុងវិស័យយុទ្ធសាស្ត្រសំខាន់ៗនៅកម្ពុជា

នៅចំពោះមុខថ្នាក់ដឹកនាំសាជីវកម្មហិរញ្ញវត្ថុអន្តរជាតិ ឯកឧត្តមឧបនាយករដ្ឋមន្ត្រីប្រចាំការ វង្សី វិស្សុត រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រីបានគូសបញ្ជាក់ពីតួនាទីរបស់វិស័យឯកជនក្នុងការរួមចំណែកជួយជំរុញកំណើន និងការអភិវឌ្ឍសង្គម និងសេដ្ឋកិច្ច និងបានលើកឡើងពីការងារអាទិភាពរបស់រាជរដ្ឋាភិបាល ដែលត្រូវធ្វើដូចជាការកែលម្អ និងពង្រឹងប្រព័ន្ធភស្តុភារកម្ម ការប្រកួតប្រជែងក្នុងវិស័យថាមពល បរិយាកាសធុរកិច្ច និងការអភិវឌ្ឍជំនាញដើម្បីគាំទ្រដល់ការជំរុញវិស័យឧស្សាហកម្ម និងកំណើនដែលដឹកនាំដោយវិស័យឯកជនជាដើម។

ជាមួយគ្នានេះ ឯកឧត្តម ស្នើឱ្យ IFC បន្តពង្រឹងកិច្ចសហប្រតិបត្តិការ និងពង្រីកការវិនិយោគក្នុងវិស័យយុទ្ធសាស្ត្រមួយចំនួននៅកម្ពុជារួមមានការវិនិយោគបៃតង និងចីរភាព តំបន់សេដ្ឋកិច្ចពិសេស ការអភិវឌ្ឍកសិ-ឧស្សាហកម្ម និងខ្សែច្រវាក់តម្លៃ ភស្តុភារកម្ម និងភាពជាដៃគូរវាងរដ្ឋ និងឯកជន និងការអភិវឌ្ឍជំនាញស្របតាមតម្រូវការវិស័យឯកជន។

ជាការឆ្លើយតបលោកស្រី Keiko Miwa បានកោតសរសើរចំពោះវឌ្ឍនភាពដ៏ឆាប់រហ័សរបស់កម្ពុជានាប៉ុន្មានទសវត្សរ៍ចុងក្រោយនេះ និងបានបញ្ជាក់ជាថ្មីនូវការប្តេជ្ញាចិត្តរបស់ IFC ក្នុងនាមជាដៃគូយូរអង្វែង ដើម្បីបន្តជួយជំរុញការអភិវឌ្ឍសេដ្ឋកិច្ចកម្ពុជាឱ្យកាន់តែរឹងមាំ៕

អត្ថបទ បូ ដូឡា,រូបភាព ខេមបូណូមីស