តើប្រទេសណាខ្លះ ដែលសង្ឃឹមទទួលបានកិច្ចព្រមព្រៀងជាមួយអាម៉េរិក ក្រោយការអនុវត្តពន្ធបដិការកាន់តែខិតជិតចូលមកដល់?

ឥណ្ឌាទំនងជាអាចក្លាយជាប្រទេសទី៣បន្ទាប់ពីចក្រភពអង់គ្លេស និងវៀតណាម ដែលអាចនឹងសម្រេចបាននូវកិច្ចព្រមព្រៀងពាណិជ្ជកម្មជាមួយសហរដ្ឋអាមេរិក។ ក្រុមមន្រ្តីទទួលបន្ទុកជាអ្នកចរចាពាណិជ្ជកម្មអាម៉េរិក និងឥណ្ឌាបានបើកការចរចាយ៉ាងស្វិតស្វាញកាលពីថ្ងៃទី២ ខែកក្កដា ដើម្បីព្យាយាមចុះកិច្ចព្រមព្រៀងកាត់បន្ថយពន្ធឲ្យបានមុនថ្ងៃទី៩ ខែកក្កដា ដែលជាថ្ងៃឱសានវាទនៃការពន្យារពេលអនុវត្តពន្ធបដិការ ប៉ុន្តែភាគីទាំងពីរនៅមានការខ្វែងគំនិតគ្នាលើផលិតផលទឹកដោះគោ និងកសិកម្មរបស់អាម៉េរិក។

ការខិតខំចរចារបស់ឥណ្ឌានេះធ្វើឡើងក្រោយលោក ដូណាល់ ត្រាំ បានប្រកាសពីការសម្រេចបានកិច្ចព្រមព្រៀងពាណិជ្ជកម្មជាមួយប្រទេសវៀតណាម ក្នុងនោះវៀតណាមទទួលបានការបញ្ចុះពន្ធពី៤៦%មកនៅ២០%រាល់ទំនិញនាំចូលទៅកាន់ទីផ្សារសហរដ្ឋអាម៉េរិក ខណៈផលិតផលអាម៉េរិកអាចនាំចូលវៀតណាមដោយមិនចចាំបាច់បង់ពន្ធ។

ពាក់ព័ន្ធនឹងការចរចាពាណិជ្ជកម្មជាមួយឥណ្ឌា លោក ត្រាំ បាននិយាយថា នៅលើយន្តហោះ Air Force One កាលពីថ្ងៃទី១ ខែកក្កដា ថា សហរដ្ឋអាម៉េរិកអាចឈានដល់កិច្ចព្រមព្រៀងជាមួយប្រទេសឥណ្ឌា ដែលនឹងកាត់បន្ថយពន្ធសម្រាប់ប្រទេសទាំងពីរ។ លោកបានលើកឡើងថា កិច្ចព្រមព្រៀងដែលនឹងអាចសម្រេចបាននេះ អាចជួយក្រុមហ៊ុនអាម៉េរិកមានលទ្ធភាពប្រកួតប្រជែងក្នុងទីផ្សាររបស់ឥណ្ឌា ដែលមានអ្នកប្រើប្រាស់ចំនួន១,៤ពាន់លាននាក់។

បន្ទាប់ពីឥណ្ឌា និងជប៉ុន សហរដ្ឋអាម៉េរិកកំពុងចរចារជាមួយប្រទេសប្រមាណ១៥ផ្សេងទៀតរួមមានចិន កូរ៉េខាងត្បូង ម៉ិកស៊ិក សហភាពអឺរ៉ុប កម្ពុជា កាណាដា ថៃ ម៉ាឡេស៊ី ហ្វីលីពីន ឥណ្ឌូនេស៊ី កោះតៃវ៉ាន់ ប៉ាគីស្ថាន ស្វីស អាហ្សង់ទីនជាដើម៕
ដោយៈ សរ សុជាតិ