លោក ត្រាំ ព្រមាននិរទេសជនអន្តោប្រវេសន៍ដែលជាប់ពន្ធធនាគារទៅកាន់ប្រទេសទី៣

រដ្ឋាភិបាលលោក ដូណាល់ ត្រាំ និយាយថា ខ្លួនគ្មានជម្រើសអ្វីក្រៅពីនិរទេសឧក្រិដ្ឋជ នទៅកាន់ប្រទេសទី៣នោះឡើយ ព្រោះសូម្បីប្រទេសកំណើតរបស់ពួកគេក៏មិនទទួលយកពួកគេវិញនោះដែរ។ ទោះជាយ៉ាងណា របាយការណ៍ស៊ើបអង្កេតបានបង្ហាញថា យ៉ាងហោចណាស់បុរស៥នាក់ដែលត្រូវបានគំរាមនិរទេស ឬបណ្ដេញចេញពីសហរដ្ឋអាម៉េរិក ទៅកាន់ប្រទេសទី៣ ត្រូវបានបញ្ជូនត្រលប់ទៅប្រទេសកំណើតរបស់ពួកគេវិញនៅប៉ុន្មានសប្តាហ៍ចុងក្រោយនេះ។

ប្រធានាធិបតី ដូណាល់ ត្រាំ មានគោលបំណងនិរទេស ឬបណ្ដេញជនអន្តោរប្រវេសន៍ដែលគ្មានលិខិតស្នាមត្រឹមត្រូវ ពោលគឺរស់នៅដោយខុសច្បាប់រាប់លាននាក់ ហើយបានជំរុញឱ្យបញ្ជូនពួកគេមួយចំនួនរួមទាំងឧក្រិដ្ឋជនទៅកាន់ប្រទេសទី៣ ដូចជាប្រទេសស៊ូដង់ខាងត្បូង និងប្រទេសអេស្វាទីនី (Eswatini ) នៅទ្វីបអាហ្វ្រិកជាដើម។

ជាធម្មតា ជនអន្តោប្រវេសន៍ដែលប្រព្រឹត្តបទឧក្រិដ្ឋធ្ងន់ធ្ងរ ត្រូវជាប់ទោសពន្ធនាគារនៅក្នុងសហរដ្ឋអាម៉េរិកឱ្យចប់សព្វគ្រប់ មុននឹងត្រូវបាននិរទេសដូចដែលបានកើតឡើងលើឧក្រិដ្ឋជនមួយចំនួនដែលត្រូវបានបញ្ជូនទៅកាន់ប្រទេសអាហ្វ្រិកទាំងពីរនោះរួចមកហើយ។

ក្រសួងសន្តិសុខមាតុភូមិរបស់សហរដ្ឋអាម៉េក (DHS) បាននិយាយថា ឧក្រិដ្ឋជនមួយចំនួនមានហានិភ័យបង្កភាពគ្រោះថ្នាក់យ៉ាងខ្លាំង ដែលសូម្បីប្រទេសកំណើតរបស់ពួកគេក៏បដិសេធមិនទទួលយកពួកគេដែរ។ ទោះជាយ៉ាងណា ក្រុមអ្នករិះគន់និយាយថា គ្មានភស្តុតាងណាបញ្ជាក់ថា សហរដ្ឋអាម៉េរិក មានចេតនាល្អបានព្យាយាមបញ្ជូនពួកគេត្រលប់ទៅកាន់ប្រទេសកំណើតរបស់ពួកគេជាមុនសិននោះឡើយ។

តួយ៉ាង ក្នុងសំណុំរឿងបុរស៥នាក់ដែលត្រូវបានគំរាមថា នឹងនិរទេសទៅកាន់ប្រទេសលីប៊ី ទីបំផុតត្រូវបានបញ្ជូនត្រលបប់ទៅកាន់ប្រទេសកំណើតរបស់ពួកគេវិញ គឺប្រទេសវៀតណាម ប្រទេសឡាវ និងប្រទេសម៉ិកស៊ិក បន្ទាប់ពីចៅក្រមមួយបានចេញសាលក្រមរារាំងការបណ្ដេញពួកគេទៅកាន់ប្រទេសលីប៊ី។

ទាក់ទិនបញ្ហានេះ ក្រសួងសន្តិសុខមាតុភូមិរបស់សហរដ្ឋអាម៉េក (DHS) មិនបានឆ្លើយបំភ្លឺនោះទេ ហើយក៏គ្មានការបញ្ជាក់ពីហេតុផល ដែលសហរដ្ឋអាម៉េរិក បានព្យាយាមបញ្ជូនពួកគេទៅប្រទេសលីប៊ី តាំងពីដំបូងបែបនេះនោះដែរ៕

ដោយ:  តែម សុខុម