ទុនបម្រុងអន្តរជាតិ ជាប្រាក់ដុល្លារអាម៉េរិក ទូទាំងពិភពលោកធ្លាក់ចុះខ្លាំងបំផុតមិនធ្លាប់មាន តើមកពីមូលហេតុអ្វី?

ទុនបម្រុងអន្តរជាតិ ជាប្រាក់ដុល្លារអាម៉េរិក ទូទាំងពិភពលោក បានធ្លាក់ចុះខ្លាំងបំផុតមិនធ្លាប់មាន ខណៈដែលទុនបម្រុងជាមាស និងប្រាក់យេនកើនឡើង។ យោងតាមទិន្នន័យរបស់មូលនិធិរូបិយវត្ថុអន្តរជាតិ IMF បានបង្ហាញថា គិតត្រឹមដំណាច់ឆ្នាំ២០២៤ ទុនបម្រុងអន្តរជាតិ ទូទាំងពិភពលោកមានទំហំជាង១២ទ្រីលានដុល្លារ ហើយក្នុងនោះប្រាក់ដុល្លារអាម៉េរិក មានចំណែកគ្របដណ្ដប់រហូតដល់ទៅ៥៧,៨%នៃទុនបម្រុងអន្តរជាតិ ទាំងអស់ ដោយធ្លាក់ចុះ០,៦% ដែលជាកម្រិតទាបបំផុតចាប់តាំងពីឆ្នាំ១៩៩៥ មក។

គួររំលឹកថា ទុនបម្រុងអន្តរជាតិ ជាប្រាក់ដុល្លារអាម៉េរិក ទូទាំងពិភពលោកបានកើនលើស៧០% ដែលជាកម្រិតកំពូលរបស់ខ្លួននៅអំឡុងឆ្នាំ២០០០។

អ្នកជំនាញបានលើកឡើងថា ការធ្លាក់ចុះទុនបម្រុងអន្តរជាតិ ជាប្រាក់ដុល្លារអាម៉េរិក នេះ កើតមានឡើងនៅពេលដែលប្រទេស និងធនាគារកណ្ដាលនានា បង្កើនការធ្វើពិពិធកម្មទុនបម្រុងអន្តរជាតិរបស់ខ្លួនដូចជារូបិយប័ណ្ណផ្សេងៗ រួមមានប្រាក់យេន របស់ជប៉ុន និងមាសជាដើម ដើម្បីកាត់បន្ថយការពឹងផ្អែកលើប្រាក់ដុល្លារអាម៉េរិក។

តួយ៉ាង យោងតាមស្ថាប័នក្រុមប្រឹក្សាមាសពិភពលោកបានឱ្យដឹងថា ប្រទេសរុស្ស៊ី បានកាន់កាប់មាសរហូតដល់ទៅប្រមាណ២,៣០០តោន ក្នុងទុនបម្រុងអន្តរជាតិ របស់ខ្លួន គិតត្រឹមខែធ្នូ ឆ្នាំ២០២៤ ដែលស្មើនឹង៣២% នៃទុនបម្រុងអន្តរជាតិ សរុបរបស់ខ្លួន។

សាស្ត្រាចារ្យសេដ្ឋកិច្ចជប៉ុន គីយុតាកា សាតុ (Kiyotaka Sato) នៅសកលវិទ្យាល័យជាតិ យ៉ូកូហាម៉ា ក្នុងប្រទេសជប៉ុន បាននិយាយថា ប្រទេសដែលមិនសប្បាយចិត្តជាមួយសហរដ្ឋអាម៉េរិក ព្រមទាំងប្រទេសផ្សេងៗទៀតនៅលោកខាងលិច កំពុងព្យាយាមបង្កើតប្រព័ន្ធមួយ ដើម្បីទូទាត់ពាណិជ្ជកម្មដោយប្រើប្រាស់រូបិយប័ណ្ណផ្សេងៗជាជាងប្រាក់ដុល្លារអាម៉េរិក៕

ដោយ: តែម សុខុម