តើសេដ្ឋកិច្ចពិភពលោកមានស្ថានភាពយ៉ាប់យ៉ឺន ឬល្អប្រសើរយ៉ាងណាដែរ មកទល់ពេលនេះ?

ការផ្អាកការអនុវត្តពន្ធបដិការរយៈពេល៩០ថ្ងៃ កាលពីថ្ងៃទី៩ ខែមេសា អាចជាការបន្ធូរបន្ថយការភ័យខ្លាចដ៏អាក្រក់មួយរបស់អ្នកវិនិយោគ ហើយក៏ជាមូលដ្ឋានធ្វើឱ្យទិន្នន័យសេដ្ឋកិច្ច និងសូចនាករហិរញ្ញវត្ថុពិភពលោកមានភាពវិជ្ជមានជាបណ្តោះអាសន្នផងដែរ ក៏ប៉ុន្តែនៅពេលអនាគតអ្នកវិភាគជាច្រើននៅតែបង្ហាញការព្រួយបារម្ភចំពោះស្ថានភាពសេដ្ឋកិច្ចពិភពលោកដដែល។

ពាក់ព័ន្ធនឹងបញ្ហានេះ លោក ហ្គាយ មីលល័រ (Guy Miller) ប្រធានក្រុមអ្នកយុទ្ធសាស្រ្តទីផ្សារនៅក្រុមហ៊ុនធានារ៉ាប់រង Zurich Insurance Group បានលើកឡើងថា ហានិភ័យនៃការធ្លាក់ចុះសេដ្ឋកិច្ចសកលបានកើនឡើងគួរឱ្យកត់សម្គាល់។ លោកបានអះអាងថា ហានិភ័យនៃការធ្លាក់ចុះសេដ្ឋកិច្ចរបស់សហរដ្ឋអាម៉េរិក គឺមានជិត ៥០ លើ ៥០ហើយនៅពេលនេះ។

ស្ថិតិបានបង្ហាញថា អត្រាទីផ្សារការងារចុងក្រោយរបស់សហរដ្ឋអាម៉េរិក បានបង្ហាញពីស្ថានភាពសេដ្ឋកិច្ចដែលមានភាពធន់ តែជារួមនៅត្រីមាសទី១ដើមឆ្នាំ២០២៥ ស្ថានភាពសេដ្ឋកិច្ចនៅសហរដ្ឋអាម៉េរិក និង តំបន់ចាយប្រាក់អឺរ៉ូ គឺមានការធ្លាក់ចុះ។ ទន្ទឹមនឹងនេះ សូចនាករទំនុកចិត្តអាជីវកម្ម និងអំណាចទិញរបស់អតិថិជនមានភាពទន់ខ្សោយកាន់តែយ៉ាប់យ៉ឺន ដែលជាសញ្ញាមួយបង្ហាញពីរលកនៃកំណើនមានអន់ថយ។

ក្រុមហ៊ុនហិរញ្ញវត្ថុអង់គ្លេស Barclays បានអះអាងថា តាមរយៈទិដ្ឋភាពទាំងអស់នេះ វាបានបង្ហាញពីការធ្លាក់ចុះនៃសេដ្ឋកិច្ចនៅលើពិភពលោក ប៉ុន្តែវានឹងមានការប្រែប្រួលវិញ ប្រសិនបើសហរដ្ឋអាម៉េរិក អាចរៀបចំកិច្ចព្រមព្រៀងពាណិជ្ជកម្មក្នុងពេលឆាប់ៗ ឬមានការបញ្ចុះអត្រាពន្ធគយ។

ដោយឡែក លោក រូបេន សេហ្គូរ៉ា ខេយូឡា (Ruben Segura-Cayuela) អ្នកសេដ្ឋវិទូ នៅក្រុមហ៊ុន BofA បាននិយាយថា ការងើបឡើងវិញនៃការចំណាយរបស់អ្នកប្រើប្រាស់មិនថាតែនៅសហរដ្ឋអាម៉េរិក ឬក្នុងតំបន់ចាយប្រាក់អឺរ៉ូនោះទេ សុទ្ធតែជាកត្តាចម្បងដែលអាចជួយបញ្ចៀសពីការធ្លាក់ចុះរបស់សេដ្ឋកិច្ចសកល។

យ៉ាងណាមិញ តម្លៃប្រេងសកលបានធ្លាក់ចុះប្រមាណ១៦% ទៅហើយនៅឆ្នាំនេះ ដោយវាបានធ្លាក់ចុះមកនៅត្រឹមប្រមាណ៦០ដុល្លារ ក្នុងមួយបារ៉ែល ដែលជាតម្លៃមួយដ៏ថោកបំផុត ចាប់តាំងពីផ្ទុះការរីករាលដាលនៃជំងឺកូវីដ-១៩ នាឆ្នាំ២០២០៕

ដោយៈ សរ សុជាតិ