តើកម្ពុជា គួរប្រើយន្តការណាដើម្បីអាចទាមទារដីដែលថៃ កំពុងកាន់កាប់ដោយខុសច្បាប់ត្រឡប់មកវិញ?
ក្រោយយោធាថៃ បានឈ្លានពាន និងកាន់កាប់ទឹកដីកម្ពុជា ទាំងខុសច្បាប់ ថ្មីៗនេះគេសង្កេតឃើញថា ថៃ បានសាងសង់សំណង់រឹងនៅទឹកដីខ្មែរជាច្រើនកន្លែង ដែល…
នៅក្នុងចំណាត់ការដ៏គួរឱ្យភ្ញាក់ផ្អើល Suzuki Motor ដែលជាក្រុមហ៊ុនដ៏ល្បីល្បាញរបស់ជប៉ុនបានទម្លាយឱ្យដឹងថា ខ្លួនបានយល់ព្រមលក់រោងចក្រផលិតរថយន្តរបស់ខ្លួននៅខេត្តរ៉ាក់យ៉ង ប្រទេសថៃ ឱ្យទៅក្រុមហ៊ុន Ford Motor ដែលជាក្រុមហ៊ុនយក្សរបស់សហរដ្ឋអាម៉េរិក ក្រោយពីឈប់ផលិតទាំងស្រុងនៅដំណាច់ឆ្នាំ២០២៥ ហើយនឹងចាកចេញពីទីផ្សារប្រទេសថៃ ឆាប់ៗនេះ។
ការសម្រេចចិត្តរបស់ក្រុមហ៊ុននេះ ធ្វើឡើងបន្ទាប់ពីការផលិតរថយន្តរបស់ខ្លួនបានធ្លាក់ចុះយ៉ាងខ្លាំង ដោយបានធ្លាក់ចុះពីជិត៦០,០០០គ្រឿងក្នុងមួយឆ្នាំ ដែលជាកម្រិតខ្ពស់បំផុតរបស់ខ្លួនមកនៅត្រឹម៤,៤០០គ្រឿងនៅឆ្នាំ២០២៤។ ក្រុមហ៊ុន Suzuki បាននិយាយថា រថយន្តតូចៗដែលខ្លួនផលិតលក់មិនដាច់ដូចការរំពឹងទុកនោះទេ ហើយណាមួយលុយបាតរបស់ថៃ ហក់ឡើងថ្លៃ និងសម្ពាធសេដ្ឋកិច្ចនៅក្នុងប្រទេសថៃ បានធ្វើឱ្យការផលិតរបស់ខ្លួនមិនសូវមានស្ថិរភាព។
រោងចក្ររបស់ក្រុមហ៊ុនជប៉ុន Suzuki នៅខេត្តរ៉ាក់យ៉ង ដែលបានបើកដំណើរការចាប់តាំងពីឆ្នាំ២០១២ ជាមួយនឹងទំហំទុនវិនិយោគប្រមាណ១២៨លានដុល្លារអាម៉េរិក មានសមត្ថភាពផលិតរថយន្តបានចំនួន៨០,០០០គ្រឿងក្នុងមួយឆ្នាំ ហើយធ្លាប់បានផលិតម៉ូដែលពេញនិយមមួយចំនួនដូចជាម៉ូឌែល Swift ជាដើម។
សម្រាប់ក្រុមហ៊ុនយក្សអាម៉េរិក Ford ការទិញយករោងចក្រនេះ នឹងពង្រឹងប្រតិបត្តិការរបស់ខ្លួននៅក្នុងប្រទេសថៃ ដែលជាមូលដ្ឋាននាំចេញដ៏សំខាន់សម្រាប់រថយន្តភីកអាប់ម៉ូឌែល Ranger និងរថយន្ត SUV ម៉ូឌែល Everest របស់ខ្លួន។ កិច្ចព្រមព្រៀងទិញលក់នេះ ក៏ឆ្លុះបញ្ចាំងពីការផ្លាស់ប្តូរកាន់តែទូលំទូលាយក្នុងឧស្សាហកម្មរថយន្តនៅប្រទេសថៃ ផងដែរ ជាកន្លែងដែលបណ្ដាក្រុមហ៊ុនផលិតរថយន្តជប៉ុន កំពុងបាត់បង់ទីផ្សារជាបន្តបន្ទាប់ដោយសារការប្រកួតប្រជែងកាន់តែខ្លាំងក្លាពីរថយន្តអគ្គិសនីចិន ដែលកំពុងរីកចម្រើនយ៉ាងឆាប់រហ័ស។
ទោះជាយ៉ាងណា ទំហំនៃកិច្ចព្រមព្រៀងទិញលក់រោងចក្រនេះមិនត្រូវបានម្លាយឱ្យដឹងនោះទេ ហើយដំណើរការនៃការផ្ទេររោងចក្រនេះត្រូវបានគេរំពឹងថា នឹងបញ្ចប់សព្វគ្រប់នៅក្នុងរយៈពេលប៉ុន្មានខែខាងមុខនេះ៕
ដោយ: តែម សុខុម
