បណ្ដាក្រុមហ៊ុនជប៉ុនរកស៊ីនៅវៀតណាមប្រឈមការប្រកួតប្រជែងពីក្រុមហ៊ុនចិនកាន់តែខ្លាំង

អង្គការពាណិជ្ជកម្មក្រៅប្រទេសជប៉ុន បានស្ទង់មតិក្រុមហ៊ុនជប៉ុនចំនួន៩០៦ នៅវៀតណាម ហើយបានរកឃើញសម្ពាធកើនឡើងនៅទូទាំងអាស៊ាន ខណៈដែលវិនិយោគិនចិន កាន់តែច្រើនចូលមកបោះទុនវិនិយោគក្នុងតំបន់យ៉ាងគំហុក។ នៅប្រទេសវៀតណាម ក្រុមហ៊ុនប្រឈមមុខនឹងការប្រកួតប្រជែងកាន់តែខ្លាំងឡើង ដោយសារកង្វះកម្លាំងពលកម្មជំនាញ ឯកសារស្មុគស្មាញ អ្នកផ្គត់ផ្គង់ក្នុងស្រុកទន់ខ្សោយ និងផលប៉ះពាល់នៃពន្ធគយរបស់សហរដ្ឋអាម៉េរិក។

ការិយាធិបតេយ្យ គឺជាបញ្ហាធំមួយនៅក្នុងប្រទេសវៀតណាម ដោយមានក្រុមហ៊ុនរហូតដល់ជាង៦៧% បានលើកឡើងពីការផ្តល់អាជ្ញាបណ្ណ និងនីតិវិធី ដែលមានភាពស្មុគស្មាញ ខណៈជិត៣៥% នៃក្រុមហ៊ុនជប៉ុន នៅវៀតណាម នាំចេញទៅកាន់សហរដ្ឋអាម៉េរិក ភាគច្រើនជាផលិតផលអេឡិចត្រូនិក និងដឹកជញ្ជូន។ ហើយបន្ទាប់ពីមានការដាក់ពន្ធគយថ្មីៗ ក្រុមហ៊ុនជាច្រើនបានចាប់ផ្តើមស្វែងរកអតិថិជននៅវៀតណាម ឬប្រទេសដទៃទៀត។

ពេលនេះប្រទេសចិន គឺជាអ្នកវិនិយោគធំបំផុតទី២ របស់វៀតណាម បន្ទាប់ពីសិង្ហបុរី ដោយនាំមុខជប៉ុន។ ក្រុមហ៊ុនចិន ដូចជា BYD, Jinko Solar និង Mixue ជាដើមកំពុងពង្រីកខ្លួន ដែលធ្វើឱ្យការជ្រើសរើសបុគ្គលិកកាន់តែពិបាក។ ស្ទើរតែពាក់កណ្តាលនៃក្រុមហ៊ុនជប៉ុន និយាយថា ការជ្រើសរើសបុគ្គលិកកាន់តែពិបាក ដែលភាគច្រើនដោយសារតែការប្រកួតប្រជែងពីនិយោជក ឬថៅកែចិន។ ប៉ុន្តែទោះបីជាមានបញ្ហាប្រឈមក៏ដោយ ក៏ទំនុកចិត្តរបស់វិនិយោគិននៅតែខ្ពស់។

ប្រមាណ៥៧% នៃអាជីវកម្មជប៉ុន មានគម្រោងពង្រីកខ្លួននៅក្នុងប្រទេសវៀតណាម ជាពិសេសនៅក្នុងវិស័យម្ហូបអាហារ លក់រាយ សារធាតុគីមី និងគ្រឿងអេឡិចត្រូនិក។ អង្គការពាណិជ្ជកម្មក្រៅប្រទេសជប៉ុន បាននិយាយថា វៀតណាម នៅតែជាគោលដៅពង្រីកអាជីវកម្មដ៏ទាក់ទាញបំផុតនៅក្នុងអាស៊ាន៕

ដោយ: តែម សុខុម