នាយករដ្ឋមន្ត្រីជប៉ុននឹងចុះចេញពីតំណែង ដើម្បីទទួលកំហុសដែលធ្វើឱ្យបាត់សំឡេងគាំទ្រក្នុងសភាជាន់ខ្ពស់

ការប្រកាសចុះចេញពីតំណែងនាយករដ្ឋមន្ត្រីរបស់លោក ស៊ីហ្គឺរុ អ៊ីស៊ីបា ធ្វើឡើងភ្លាមៗនៅ១ថ្ងៃមុនគណបក្សប្រជាធិបតេយ្យសេរី (LDP) របស់ លោក គ្រោងបោះឆ្នោតសម្រេចថា តើត្រូវបោះឆ្នោតជ្រើសរើសថ្នាក់ដឹកនាំមុនកាលកំណត់ ឬយ៉ាងណា ប្រសិនបើលោក អ៊ីស៊ីបា មិនព្រមចុះចេញពីតំណែង។ ការប្រកាសពីការលាលែងពីតំណែងនេះកើតឡើងនៅ៤ថ្ងៃក្រោយលោក ចរចាសម្រេចបានកិច្ចព្រមព្រៀងពាណិជ្ជកម្មជាមួយរដ្ឋបាលលោក ដូណាល់ ត្រាំ លើការនាំចេញរបស់ជប៉ុនទៅកាន់សហរដ្ឋអាម៉េរិកក្នុងអត្រាពន្ធ១៥%។

ថ្លែងក្នុងសន្និសីទសារព័ត៌មានកាលពីល្ងាចថ្ងៃអាទិត្យ លោក Ishiba បាននិយាយថា លោកបានសម្រេចចិត្តលាលែងពីតំណែងជាប្រធានគណបក្ស LDP ហើយតាមរយៈការចុះចេញពីតំណែងជាមេដឹកនាំគណបក្សដ៏ធំបំផុតនៅក្នុងសភាជាន់ទាបនេះ លោក Ishiba បានផ្តល់សញ្ញាថា លោកនឹងបើកផ្លូវឱ្យមានការរើសនាយករដ្ឋមន្ត្រីថ្មីផងដែរ។

លោកបាននិយាយថា ឥឡូវនេះវាជាពេលវេលាដ៏ស័ក្តិសមសម្រាប់លោកក្នុងការចុះចេញពីតំណែង ព្រោះកិច្ចព្រមព្រៀងពាណិជ្ជកម្មរវាងជប៉ុន និងសហរដ្ឋអាម៉េរិកបានសម្រេចជាផ្លូវការហើយកាលពីថ្ងៃព្រហស្បតិ៍ សប្តាហ៍មុន។

ការសម្រេចលាលែងពីតំណែងរបស់លោក Ishiba នេះធ្វើឡើងបន្ទាប់ពីក្រុមចម្រុះកំពុងកាន់អំណាចបានបាត់បង់ការគ្រប់គ្រងសភាជាន់ទាបក្នុងការបោះឆ្នោតទូទៅនៅថ្ងៃទី២៧ ខែតុលា ឆ្នាំ២០២៤ និងការបាត់បង់ការគ្រប់សភាជាន់ខ្ពស់ក្នុងការបោះឆ្នោតកាលពីថ្ងៃទី២០ ខែកក្កដា ឆ្នាំ២០២៥ ផងដែរ។ ទោះបរាជ័យជាបន្តបន្ទាប់ក៏ដោយ លោក Ishiba បានបន្តកាន់តំណែងដោយពន្យល់ថា រដ្ឋបាលរបស់លោក ត្រូវតែបំពេញកាតព្វកិច្ចក្នុងការស្វែងរកកិច្ចព្រមព្រៀងរវាងជប៉ុន និងអាម៉េរិក៕

ដោយ៖ សុខ មង្គល