វិស័យសំណង់ជាផ្នែកដ៏សំខាន់មួយសម្រាប់សេដ្ឋកិច្ចរបស់ជប៉ុន ដែលមានចំណែកគ្របដណ្ដប់៥%នៃផលិតផលក្នុងស្រុកសរុប (GDP) ហើយស្មើនឹង១ភាគ៣នៃការវិនិយោគដើមទុនសរុប។ ប៉ុន្តែដោយសារខ្វះកម្មករកាន់តែខ្លាំង និងបទប្បញ្ញត្តិកាន់តែតឹងរ៉ឹង ស្ដីពីការធ្វើការថែមម៉ោងរបស់កម្មករ គម្រោងសាងសង់ជាច្រើនកំពុងត្រូវបានពន្យារពេល។ ជាក់ស្តែងក្រុមហ៊ុនផ្សារទំនើប Aeon Mall ត្រូវពន្យារពេលសម្ពោធដាក់ឱ្យដំណើរការផ្សារទំនើបថ្មីមួយកន្លែងនៅហ្វូគូស៊ីម៉ា (Fukushima) រយៈពេល២ឆ្នាំ ដោយសារសាងសង់មិនទាន់សភាពការណ៍ ព្រោះខ្វះកម្មករ។
ក្នុងឆ្នាំ២០២៤ ឧស្សាហកម្មសំណង់របស់ប្រទេសជប៉ុន មានកម្មករចំនួនជាង៤,៧លាននាក់ ពោលគឺធ្លាក់ចុះ៦% បើធៀបទៅនឹងមួយទសវត្សរ៍មុន។ ហើយបច្ចុប្បន្នប្រមាណ៨សែននាក់ ឬស្មើនឹងជិត២០%នៃកម្មករទាំងនោះមានអាយុលើស៦៥ឆ្នាំ ដោយកើនឡើង៥% បើធៀបនឹងទសវត្សរ៍មុន។ ម៉ោងធ្វើការជាមធ្យមនៅក្នុងឧស្សាហកម្មសាងសង់បានធ្លាក់ចុះច្រើនជាងគេ បើធៀបនឹងឧស្សាហកម្មដទៃទៀត បន្ទាប់ពីច្បាប់ថ្មីចូលជាធរមាន។
នៅក្នុងតំបន់នានាដូចជា ហុកកៃដូ (Hokkaido) មានការប្រកួតប្រជែងគ្នាខ្លាំងក្នុងការដណ្ដើមកម្មករ ដោយសារតែគម្រោងធំៗដូចជារោងចក្រផលិតបន្ទះឈីបជាដើម សុទ្ធតែខ្វះកម្លាំងពលកម្ម ហើយជាលទ្ធផលប្រាក់ឈ្នួលឡើងថ្លៃ ខណៈដែលក្រុមហ៊ុនសំណង់តូចៗកំពុងជួបបញ្ហាត្រដាបត្រដួសរហូតឈានដល់ការបិទទ្វារ និងប្រកាសក្ស័យធនជាបន្តបន្ទាប់។
ដោយសារតែស្ថានភាពនេះ ក្រុមហ៊ុននានាកាន់តែចម្រាញ់ខ្លាំងឡើង ពោលគឺជ្រើសរើសយកតែគម្រោងណាដែលទទួលបានប្រាក់ចំណេញច្រើនប៉ុណ្ណោះ។ ទន្ទឹមនេះ ថ្លៃដើមនៃការសាងសង់ ក៏បានកើនឡើងយ៉ាងខ្លាំងផងដែរ ពោលគឺកើនឡើងរហូតដល់ទៅ១៨%សម្រាប់អគារឧស្សាហកម្មក្នុងឆ្នាំ២០២៤។
បញ្ហាប្រឈមដ៏ធំមួយ គឺឧស្សាហកម្មសាងសង់ផ្លាស់ប្តូរឆ្ពោះទៅរកការប្រើប្រាស់បច្ចេកវិទ្យា និងការធ្វើស្វ័យប្រវត្តិកម្មយឺតយ៉ាវពេក។ ជាការកត់សម្គាល់ ក្រុមហ៊ុនសំណង់ភាគច្រើនមានទំហំតូច ហើយវិនិយោគតិចតួចលើឧបករណ៍ឌីជីថលដែលចាញ់ប្រទេសដទៃទៀត ទោះបីជាជប៉ុន ជាប្រទេសដែលមានបច្ចេកវិទ្យារីកចម្រើនខ្លាំងយ៉ាងណាក្ដី។
ក្រុមអ្នកជំនាញនិយាយថា បើគ្មានកម្មករបន្ថែមទៀត ឬគ្មានបច្ចេកវិទ្យាដែលល្អប្រសើរជាងនេះទេ ការពន្យារពេលនៃការសាងសង់នៅជប៉ុន អាចប៉ះពាល់ដល់សេដ្ឋកិច្ចជាតិកាន់តែខ្លាំង ព្រោះការជំរុញផលិតភាពតាមរយៈការធ្វើឌីជីថលនីយកម្ម និងនវានុវត្តន៍ពេលនេះគឺចាំបាច់ណាស់៕
ដោយ: តែម សុខុម
