ក្រុមមេដឹកនាំអង្គការណាតូ ប្ដេជ្ញាបង្កើនចំណាយលើវិស័យការពារជាតិ តាមការស្នើសុំរបស់លោក ត្រាំ
ក្រោយចប់កិច្ចប្រជុំកំពូលនៅទីក្រុងឡាអេ ប្រទេសហូឡង់ ក្រុមមេដឹកនាំអង្គការណាតូ បានចេញសេចក្ដីថ្លែងការណ៍រួម ដោយគាំទ្រការបង្កើនការចំណាយដ៏ច្រើនល…
កម្មវធីនេះ មានការអញ្ជើញចូលរួមដោយ ឯកឧត្តមបណ្ឌិត យ៉េត វីណែល អនុរដ្ឋលេខាធិការ ក្រសួងសេដ្ឋកិច្ចនិងហិរញ្ញវត្ថុ និងជាអគ្គលេខាធិការរង នៃអគ្គលេខាធិការដ្ឋានគណៈកម្មាធិការដឹកនាំការងារកែទម្រង់ ការគ្រប់គ្រងហិរញ្ញវត្ថុសាធារណៈ (អ.គ.ហ.) តំណាងដ៏ខ្ពង់ខ្ពស់ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ និងជាប្រធានគណៈកម្មាធិការដឹកនាំការងារកែទម្រង់ការ-គ្រប់គ្រងហិរញ្ញវត្ថុសាធារណៈ និង ឯកឧត្តម រស់ សីលវ៉ា រដ្ឋលេខាធិការ ក្រសួងសេដ្ឋកិច្ចនិងហិរញ្ញវត្ថុ និងជាអគ្គលេខាធិការ នៃ អ.គ.ហ., អមដោយ ឯកឧត្តម អ៊ុំ យុទ្ធី នាយករដ្ឋបាល ហិរញ្ញវត្ថុ និង ត្រួតពិនិត្យនិងវាយតម្លៃ នៃ អ.គ.ហ. បានអញ្ជើញចូលរួមជាអធិបតីក្នុងកម្មវិធីបើកនិងបិទវគ្គបណ្ដុះបណ្ដាលស្ដីពីជំនាញ "KPI Professional"។
វគ្គបណ្ដុះបណ្ដាលនេះ ត្រូវបានសហការរៀបចំឡើងដោយ អ.គ.ហ. និងវិទ្យាស្ថាន KPI Institute ដែលជាស្ថាប័នឈានមុខនិងមានបទពិសោធន៍បណ្ដុះបណ្ដាលជាង ២០ឆ្នាំ លើជំនាញការគ្រប់គ្រងសមិទ្ធកម្ម, ការកំណត់សូចនាករសមិទ្ធកម្មគន្លឹះ និងជំនាញផ្សេងៗពាក់ព័ន្ធដ៏ទៃទៀត ជូនបណ្ដាប្រទេសដៃគូនានាផងដែរ។ វគ្គបណ្ដាលនេះ ត្រូវបានបែងចែកជា ២ វគ្គ និងប្រព្រឹត្តទៅរយៈពេល ២ ថ្ងៃ ក្នុងមួយវគ្គ។ ពោល វគ្គទី១ គឺចាប់ពីថ្ងៃទី២៤ ដល់ថ្ងៃទី២៥ ខែមិថុនា ឆ្នាំ២០២៥ រៀបចំឡើងសម្រាប់អង្គភាពក្រោមឱវាទក្រសួងសេដ្ឋកិច្ចនិងហិរញ្ញវត្ថុ និងមន្ទីរសេដ្ឋកិច្ចនិងហិរញ្ញវត្ថុរាជធានី-ខេត្តទាំង២៥, រីឯវគ្គទី២ គឺចាប់ពីថ្ងៃទី២៦ ដល់ថ្ងៃទី២៧ ខែមិថុនា ឆ្នាំ២០២៥ រៀបចំឡើងសម្រាប់ក្រសួង-ស្ថាប័ន និងរដ្ឋបាលរាជធានី-ខេត្តទាំង២៥ ដែលមានសិក្ខាកាមសរុបប្រមាណ ១៣០ នាក់។
វគ្គបណ្ដុះបណ្ដាលនេះ រៀបចំឡើងក្នុងគោលបំណងបង្កើនការយល់ដឹង និងអភិវឌ្ឍសមត្ថភាពមន្ត្រីរបស់អង្គភាពអនុវត្តគម្រោងនៅតាមក្រសួង-ស្ថាប័ន, អង្គភាពក្រោមឱវាទក្រសួងសេដ្ឋកិច្ចនិងហិរញ្ញវត្ថុ, មន្ទីរសេដ្ឋកិច្ចនិងហិរញ្ញវត្ថុរាជធានី-ខេត្ត និងរដ្ឋបាលរាជធានី-ខេត្ត តាមរយៈការបង្កើនចំណេះជំនាញលើប្រធានបទគន្លឹះនានា អំពីបច្ចេកទេសនៃការរៀបចំ និងការកំណត់សូចនាករសមិទ្ធកម្មគន្លឹះ (KPIs) សម្រាប់ជាពុទ្ធិក្នុងការរួមចំណែកកែលម្អគុណភាពនៃការរៀបចំលទ្ធផលគន្លឹះក្នុងឆ្នាំ ផែនការសកម្មភាព សូចនាករសមិទ្ធកម្មគន្លឹះ នៅអង្គភាពសាមី។
កម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ បានឈានចូលក្នុងដំណាក់កាលទី៤ “គណនេយ្យភាពសមិទ្ធកម្ម” ដែលជាដំណាក់កាលចុងក្រោយ ហើយភាពជោគជ័យនៃដំណាក់កាលនេះតម្រូវឱ្យគ្រប់អង្គភាព មានឯករាជ្យភាព ភាពជាម្ចាស់ និងមានសមត្ថភាពពេញលេញ ក្នុងការរៀបចំលទ្ធផលគន្លឹះក្នុងឆ្នាំ និងផែនការសកម្មភាព ដែលមានសូចនាករសមិទ្ធកម្មគន្លឹះច្បាស់លាស់ ដើម្បីត្រៀមខ្លួនក្នុងការអនុវត្តក្របខ័ណ្ឌស្ដីពីការគ្រប់គ្រងសមិទ្ធកម្មបច្ចុប្បន្នកម្ម ដែលទើបត្រូវបានដាក់ឱ្យអនុវត្តដោយរាជរដ្ឋាភិបាល តាមរយៈសារាចរលេខ ១៤ សរ ចុះថ្ងៃទី១៩ ខែធ្នូ ឆ្នាំ២០២៤ ស្ដីពីការគ្រប់គ្រងសមិទ្ធកម្មក្រោមកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ។
ផ្អែកលើលទ្ធផលនៃការបណ្ដុះបណ្ដាលខាងលើ ជាពិសេសដោយមើលឃើញពីអត្ថប្រយោជន៍ និងភាពចាំបាច់ក្នុងការអភិវឌ្ឍន៍សមត្ថភាព និងបង្កើនចំណេះដឹងបន្ថែមជូនដល់ក្រសួង-ស្ថាប័ន, អង្គភាពក្រោមឱវាទក្រសួងសេដ្ឋកិច្ចនិងហិរញ្ញវត្ថុ, មន្ទីរសេដ្ឋកិច្ចនិងហិរញ្ញវត្ថុ និងរដ្ឋបាលរាជធានី-ខេត្ត សំដៅលើកកំពស់ប្រសិទ្ធភាព និងស័ក្តិសិទ្ធិភាព នៃការរៀបចំ ការអនុវត្ត និងត្រួតពិនិត្យការវាយតម្លៃសមិទ្ធកម្ម, អ.គ.ហ. នឹងបន្តគាំទ្រ ក្នុងការរៀបចំវគ្គបណ្ដុះ-បណ្ដាលសម្រាប់គ្រូបង្គោល KPI (Training of Trainer – TOT) តាមរយៈការសម្រិតសម្រាំងសិក្ខាកាមឆ្នើមៗ ដើម្បីបង្កើតជាក្រុមគ្រូបង្គោល សម្រាប់ទទួលការបណ្ដុះបណ្ដាលបន្ថែមទៀត ក្នុងគោលដៅចែករំលែកចំណេះដឹង និងបទពិសោធន៍បន្តទៅកាន់អង្គភាព ឬ ស្ថាប័នដ៏ទៃទៀត ដែលមានតម្រូវការបណ្ដុះបណ្ដាលលើជំនាញ KPI នេះនាពេលខាងមុខ សំដៅកែលម្អគុណភាពនៃការរៀបចំលទ្ធផលគន្លឹះក្នុងឆ្នាំ ផែនការសកម្មភាព សូចនាករសមិទ្ធកម្មគន្លឹះ ក្នុងក្របខ័ណ្ឌកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ។
