ឡាវ និងវៀតណាមបង្កើតសកលវិទ្យាល័យរួមគ្នា ដើម្បីពង្រីកការផ្លាស់ប្តូរការអប់រំ និងអភិវឌ្ឍន៍ធនធានមនុស្ស

ឡាវ និងវៀតណាឯកភាពគ្នាបង្កើតសកលវិទ្យាល័យឡាវ-វៀតណាម នៅក្នុងប្រទេសឡាវ និងពង្រីកកម្មវិធីបញ្ជូននិស្សិតមកពីតំបន់ព្រំដែនទៅសិក្សានៅសាលារៀនវៀតណាម ដើម្បីពង្រឹងកិច្ចសហប្រតិបត្តិការអប់រំ។ ការឯកភាពគ្នានេះធ្វើឡើងក្នុងជំនួបពិភាក្សាការងាររវាងរដ្ឋមន្ត្រីក្រសួងអប់រំ និងកីឡាឡាវ លោក ថុងសាលីត ម៉ាងណូមេក (Thongsalith Mangnomek) ជាមួយនាយករដ្ឋមន្ត្រីវៀតណាមលោក ផាម មិញជិញ (Pham Minh Chinh) កាលពីថ្ងៃទី១៦ ខែធ្នូ នៅប្រទេសវៀតណាម។

កិច្ចសហប្រតិបត្តិការខាងលើផ្តោតសំខាន់លើការរៀនភាសាបរទេស ក្នុងនោះឡាវបានឯកភាពដាក់ភាសាវៀតណាមជាជម្រើសសិក្សានៅតាមរៀនរបស់ឡាវ ដោយបច្ចុប្បន្នមានសាលារៀនចំនួន១៣នៅប្រទេសឡាវ បានបង្រៀនភាសាវៀតណាមរួចទៅហើយ ខណៈប្រទេសទាំងពីរកំពុងពង្រីកកម្មវិធីបណ្តុះបណ្តាលគ្រូ។ ជាមួយគ្នានេះប្រទេសទាំងពីរប្តេជ្ញានឹងពង្រឹងកិច្ចសហប្រតិបត្តិការក្នុងការអភិវឌ្ឍធនធានមនុស្សបន្ថែមទៀត ជាពិសេសផ្នែកវិទ្យាសាស្ត្រ បច្ចេកវិទ្យា និងកីឡា៕

ដោយៈ សរ សុជាតិ