ម៉ាឡេស៊ី មានមហិច្ឆតាប្រែក្លាយខ្លួនជាមជ្ឈមណ្ឌលតភ្ជាប់ពាណិជ្ជកម្មរវាងទ្វីបអាស៊ី និងអឺរ៉ុប

ក្នុងបរិបទដែលសន្តិសុខផ្លូវទឹកកំពុងរងការគំរាមកំហែង ម៉ាឡេស៊ីបានងាកមកពង្រឹងការដឹកជញ្ជូនតាមផ្លូវដែកជាជម្រើសយុទ្ធសាស្ត្រជំនួសវិញ។ ជាក់ស្តែងគម្រោងកំពង់ផែស្ងួត Perlis Inland Port ដែលស្ថិតនៅកៀកព្រំដែនថៃ គឺជាសក្ខីភាពមួយដែលជួយឱ្យម៉ាឡេស៊ី អាចតភ្ជាប់ការដឹកជញ្ជូនទំនិញពីអាស៊ីអាគ្នេយ៍ទៅកាន់អាស៊ីកណ្តាល និងអឺរ៉ុប​តាមផ្លូវគោកយ៉ាងមានប្រសិទ្ធភាព។

បច្ចុប្បន្នម៉ាឡេស៊ី ត្រូវបានតភ្ជាប់ដោយបណ្តាញផ្លូវដែកឆ្លងកាត់តំបន់អាស៊ានរួចជាស្រេច រួមទាំងខ្សែរថភ្លើង ASEAN Express ដែលបានដាក់ឱ្យដំណើរការកាលពីឆ្នាំ២០២៤។ ខ្សែផ្លូវដែកនេះបានភ្ជាប់ម៉ាឡេស៊ីទៅកាន់ប្រទេសចិន តាមរយៈប្រទេសថៃ និងឡាវ ហើយបន្តឆ្ពោះទៅកាន់អឺរ៉ុបតាមរយៈអាស៊ីកណ្តាល។

បើទោះបីជាការដឹកជញ្ជូនតាមផ្លូវដែកមានតម្លៃថ្លៃជាងផ្លូវសមុទ្របន្តិចមែន ប៉ុន្តែវាមានអត្ថប្រយោជន៍លើសលប់ផ្នែកពេលវេលា ដោយអាចទៅដល់គោលដៅនៅអឺរ៉ុបលឿនជាងតាមផ្លូវសមុទ្ររហូតដល់ ២សប្តាហ៍។ ជាមួយគ្នានេះ តម្រូវការដឹកជញ្ជូនតាមផ្លូវដែកកំពុងមានសន្ទុះកើនឡើងខ្លាំង ដោយសារក្រុមហ៊ុនពាណិជ្ជកម្មនានាកំពុងស្វែងរកផ្លូវដឹកជញ្ជូន ដែលមានសុវត្ថិភាពខ្ពស់ និងអាចទុកចិត្តបានជាងមុន។

ទោះជាយ៉ាងណា ម៉ាឡេស៊ី នៅតែប្រឈមនឹងបញ្ហាមួយចំនួនដូចជាភាពខុសគ្នា នៃប្រព័ន្ធបច្ចេកទេសផ្លូវដែក និងនីតិវិធីគយដ៏ស្មុគស្មាញរវាងប្រទេសនីមួយៗ។ ទោះបីជាមានឧបសគ្គទាំងនេះ ក៏ដោយ ក៏ម៉ាឡេស៊ី នៅតែជឿជាក់លើឱកាសដ៏ធំធេងក្នុងការស្រូបទាញលំហូរទំនិញឱ្យបានកាន់តែច្រើន ដើម្បីសម្រេចមហិច្ឆតាក្លាយជាមជ្ឈមណ្ឌលផ្ទេរទំនិញដ៏សំខាន់បំផុតរវាងអាស៊ី និងអឺរ៉ុប ក្នុងគ្រាដែលផ្លូវពាណិជ្ជកម្មឆ្លងកាត់មជ្ឈិមបូព៌ាកំពុងជាប់ផុងក្នុងវិបត្តិ៕

ដោយ: តែម សុខុម