ធនាគារ HSBC បានដំឡើងការព្យាករកំណើនផលិតផលក្នុងស្រុកសរុប (GDP) សម្រាប់ប្រទេសម៉ាឡេស៊ី ក្នុងឆ្នាំ២០២៥ នេះពី ៤,២% ឈានដល់ ៥% ដោយសំអាងលើកត្តាធ្លាក់ចុះនៃភាពមិនប្រាកដប្រជាផ្នែកពាណិជ្ជកម្ម និងតម្រូវការក្នុងស្រុកកើនឡើង រួមទាំងកិច្ចព្រមព្រៀងពាណិជ្ជកម្ម ដែលប្រទេសនេះសម្រេចបានជាមួយសហរដ្ឋអាម៉េរិក ផងដែរ។
ធនាគារ HSBC ក៏បានគូសបញ្ជាក់ផងដែរពីភាពជោគជ័យផ្នែកការទូតរបស់ប្រទេសម៉ាឡេស៊ី នៅក្នុងកិច្ចប្រជុំកំពូលអាស៊ាន កាលពីអំឡុងខែតុលា ដែលធ្វើឱ្យបណ្ដាវិនិយោគិនកាន់តែមានទំនុកចិត្តខ្ពស់។
កំណើនសេដ្ឋកិច្ចរបស់ប្រទេសម៉ាឡេស៊ី ពេលនេះ គឺប្រដំប្រសងគ្នាជាមួយឥណ្ឌូនេស៊ី និងតាមពីក្រោយតែប្រទេសមួយប៉ុណ្ណោះ គឺវៀតណាម ដែលត្រូវបានព្យាករថា នឹងសម្រេចបានកំណើនដល់ទៅ ៧,៩%។
ធនាគារផ្សេងទៀតក៏បានដំឡើងការព្យាកររបស់ខ្លួនសម្រាប់កំណើនសេដ្ឋកិច្ចម៉ាឡេស៊ី ផងដែរ ដូចជា ធនាគារ Maybank បានដំឡើងការព្យាករកំណើនសេដ្ឋកិច្ចសម្រាប់ម៉ាឡេស៊ី ពី ៤,២% ឈានដល់ ៤,៧% ខណៈដែលធនាគារ Standard Chartered បានដំឡើងការព្យាករកំណើនពី ៤,២% ឈានដល់ ៤,៧% ដូចគ្នា។
ទិន្នន័យពីធនាគារ Bank Negara បង្ហាញថា សេដ្ឋកិច្ចរបស់ប្រទេសម៉ាឡេស៊ី សម្រេចបានកំណើន ៥,២% នៅត្រីមាសទី៣ ឆ្នាំ២០២៥ ដែលជាអត្រាលឿនបំផុតនៅឆ្នាំនេះ។ ហើយទន្ទឹមនេះ ប្រាក់រីងហ្គីត របស់ម៉ាឡេស៊ី ក៏បានហក់ឡើងថ្លៃដែរ ដោយ ៤,១៦ រីងហ្គីត ប្ដូរបាន ១ ដុល្លារអាម៉េរិក ដែលជាអត្រាខ្ពស់បំផុតក្នុងរយៈពេល ៤ ឆ្នាំមកនេះ។
ចំណែកឯធនាគារ OCBC ព្យាករថា ប្រាក់រីងហ្គីត នឹងស្ថិតក្នុងអត្រាប្រមាណ ៤,១៦ រីងហ្គីត ក្នុង ១ ដុល្លារអាម៉េរិក នៅត្រឹមដំណាច់ឆ្នាំ២០២៥ ហើយនឹងឡើងដល់ ៤,០៤ រីងហ្គីត ក្នុង ១ ដុល្លារអាម៉េរិក នៅឆ្នាំ២០២៦៕
ដោយ: តែម សុខុម
