បវរកញ្ញាថៃលំដាប់ពិភពលោក១រូបអំពាវនាវឱ្យរដ្ឋាភិបាលថៃយកចិត្តទុកដាក់ចំពោះសន្តិភាព

សារព័ត៌មាន Khaosod English បានចុះផ្សាយនៅថ្ងៃទី១៥ ខែធ្នូ ថា បវរកញ្ញាលំដាប់ពិភពលោករបស់ថៃកញ្ញា អូផល ស៊ូឆាតា ឆាងរី បានបញ្ចេញសារដោយទទូចឱ្យមេដឹកនាំប្រទេសថៃជ្រើសរើសដំណោះស្រាយសន្តិភាពនៅក្នុងសង្គ្រាមឈ្លានពានរបស់យោធាថៃមកលើកម្ពុជា។ ការអំពាវនាវដ៏កម្ររបស់បុគ្គលសាធារណៈនេះបានធ្វើឱ្យមានការវែកញែកយ៉ាងខ្លាំងនៅលើបណ្តាញសង្គម និងកំពុងប៉ះទង្គិចដល់ក្រុមអ្នកជាតិនិយម ដែលគាំទ្រយោធាថៃឱ្យបើកការវាយប្រហារលើកម្ពុជា ដើម្បីតោងប្រជាប្រិយភាព។

កញ្ញា អូផល បានលើកឡើងកាលពីថ្ងៃអាទិត្យ ទី១៤ ខែធ្នូ នៅក្នុងកម្មវិធី Global Leadership Achievement Award ដោយសង្កត់ធ្ងន់ថា ជម្រើសដែលរដ្ឋាភិបាលថៃជ្រើសរើសនៅថ្ងៃនេះ នឹងកំណត់ជីវិតរបស់មនុស្សជំនាន់ក្រោយៗទៀត ដោយក្នុងនោះ កញ្ញាជំរុញឱ្យមេដឹកនាំថៃជ្រើសរើសសន្តិភាពជាជាងសង្គ្រាម និងប្រកាន់យកជម្រើសកិច្ចសហប្រតិបត្តិការជាជាងជម្លោះ។

ក្រោយការបញ្ចេញសារនេះ អ្នកលេងបណ្តាញសង្គមខ្លះគាំទ្រដោយលើកឡើងថា សំឡេងដែលថៃត្រូវការ គឺសំឡេងសន្តិភាពមិនមែនសង្រ្គាម ប៉ុន្តៃជាមួយគ្នានោះ ក៏មានអ្នករិះគន់ចំពោះការលើកឡើងនេះច្រើនផងដែរ។ ក្រុមអ្នកគាំទ្រសន្តិភាពបានលើកឡើងថា ការអំពាវនាវឱ្យមានសន្តិភាពមិនមែនជាសញ្ញា នៃភាពទន់ខ្សោយ ឬកង្វះស្នេហាជាតិនោះទេ ប៉ុន្តែជាភាពក្លាហានដើម្បីបញ្ឈប់វដ្តនៃការស្អប់ ដើម្បីរក្សាជីវិត សេដ្ឋកិច្ច និងទំនាក់ទំនងរយៈពេលវែង។

ពួកគេបានបន្ថែមថា ការនិយាយអំពីសន្តិភាពមិនមែនជាការឆោតល្ងង់នោះទេ តែវាជាភាពក្លាហានពិតប្រាកដ និងការគិតវែងឆ្ងាយ ហើយសង្គ្រាមមិនដែលបញ្ចប់នៅលើសមរភូមិនោះទេ។ មនុស្សសាមញ្ញទាំងអស់សុទ្ធតែរងផលប៉ះពាល់ដល់ជីវិត សេដ្ឋកិច្ច និងអនាគតនៃព្រំដែន៕

ដោយៈ សរ សុជាតិ