របបដឹកនាំអ៊ីរ៉ង់ អាចប្រឈមនឹងការដួលរលំ ខណៈអ្នកស្លាប់កើនឡើងដល់ជាង១០០នាក់

ស្របពេលចលនាប្រឆាំងរបបដឹកនាំសាសនាបានបន្តរីកធំឡើងជាលំដាប់ អាជ្ញាធរអ៊ីរ៉ង់ កាលពីថ្ងៃសៅរ៍ទី១០ ខែមករា បានប្រកាសថា ខ្លួននឹងបង្កើនវិធានការបង្ក្រាបឱ្យកាន់តែខ្លាំងចំពោះបាតុកម្មប្រឆាំងនឹងរដ្ឋាភិបាលដ៏ធំបំផុតមិនធ្លាប់មាននៅក្នុងប្រទេសអ៊ីរ៉ង់។

កងឆ្មាំបដិវត្តន៍ ដែលជាកម្លាំងប្រដាប់អាវុធមានឥទ្ធិពលបំផុតនៅអ៊ីរ៉ង់ បានទម្លាក់កំហុសនៃភាពចលាចលនេះទៅលើក្រុមភេរវករ ហើយបានប្តេជ្ញាការពារប្រព័ន្ធដឹកនាំបច្ចុប្បន្នឱ្យខានតែបាន។ ទោះបីជាប្រព័ន្ធអ៊ីនធឺណិតត្រូវបានកាត់ផ្តាច់ និងការទំនាក់ទំនងផ្សេងៗត្រូវបានរឹតត្បិតយ៉ាងណាក្តី ប៉ុន្តែរបាយការណ៍ថ្មីៗអំពីអំពើហិង្សានៅទូទាំងប្រទេសអ៊ីរ៉ង់ នៅតែបន្តកើតឡើង នៅក្នុងរដ្ឋធានីតេអេរ៉ង់ និងទីក្រុងជាច្រើនទៀត។

នៅទីក្រុងតេអេរ៉ង់ ដែលជារដ្ឋធានីរបស់ប្រទេសនេះ ហ្វូងមនុស្សចេញមកតវ៉ា ហើយនៅតាមផ្លូវត្រូវគេពិពណ៌នាថា ពោរពេញដោយអំពើហិង្សា ការដុតបំផ្លាញ និងសំឡេងស្រែកប្រឆាំងនឹងមេដឹកនាំកំពូលអ៊ីរ៉ង់ គឺលោក អាយ៉ាតូឡា អាលី ខាមេនី (Ayatollah Ali Khamenei)។

ពាក់ព័ន្ធនឹងតួលេខនៃអ្នករងគ្រោះ អាជ្ញាធរអ៊ីរ៉ង់ បានអះអាងថា មនុស្សចំនួន៦៥នាក់បានស្លាប់ ក្នុងនោះមានក្រុមអ្នកតវ៉ា៥០នាក់ និងកម្លាំងសន្តិសុខ១៥នាក់ និងមនុស្សប្រហែល២,៣០០នាក់ត្រូវបានចាប់ខ្លួន។ ប៉ុន្តែបើតាមការចុះផ្សាយរបស់ទីភ្នាក់ងារសារព័ត៌មាន AP បានបង្ហាញតួលេខខ្ពស់ជាងនេះ ដោយចំនួនអ្នកស្លាប់បានកើនឡើងដល់១១៦នាក់ និងអ្នកត្រូវបានចាប់ខ្លួនមានចំនួនប្រមាណ២,៦០០នាក់។

រហូតមកដល់ពេលនេះ គេនៅមិនទាន់អាចវាយតម្លៃស្ថានការណ៍ច្បាស់លាស់នៅឡើយទេ ប៉ុន្តែបើតាមសេចក្តីរាយការណ៍ចុងក្រោយ កងឆ្មាំបដិវត្តន៍អ៊ីរ៉ង់បានចាប់ផ្តើមពង្រាយកម្លាំង និងបានបើកការបាញ់ប្រហារនៅតំបន់មួយចំនួន ដើម្បីបង្ក្រាបក្រុមអ្នកតវ៉ា៕

ដោយៈ សរ សុជាតិ