បណ្តាក្រុមហ៊ុនអភិវឌ្ឍន៍ខុនដូនៅថៃ ស្នើឱ្យរាជរដ្ឋាភិបាលជួយអន្តរាគមន៍បន្ទាន់ លើវិបត្តិបណ្ណបំណុលអចលនទ្រព្យជិត ៨ពាន់លានដុល្លារ

សារព័ត៌មាន ឌឹណេសិន បានរាយការណ៍ថា ព្រោះតែបញ្ហាធំៗទាំងនេះ សមាគមខុនដូថៃ បានជំរុញឱ្យក្រុមប្រឹក្សារដ្ឋាភិបាលដោះស្រាយវិបត្តិសញ្ញាបណ្ណបំណុលចំពោះអចលនទ្រព្យ ដែលត្រូវសងសម្រាប់រយៈពេល២១ខែ ដោយរាប់ចាប់ពីខែមេសា ឆ្នាំ២០២៥ ដល់ ខែធ្នូឆ្នាំ២០២៦ នៅក្នុងទំហំទឹកប្រាក់សរុបប្រមាណជាជិត៨ពាន់លានដុល្លារ ។

ប្រភពដដែលបានអះអាងថា ការធ្លាក់ចុះសេដ្ឋកិច្ច រួមផ្សំដោយការរញ្ជួយដីនាពេលថ្មីៗនេះ និងគោលនយោបាយពន្ធរបស់សហរដ្ឋអាម៉េ​រិក បានបង្ហាញពីបញ្ហាប្រឈមដ៏ធ្ងន់ធ្ងរ និងស្មុគស្មាញ ជាពិសេសសម្រាប់វិស័យនាំចេញរបស់ប្រទេសថៃ ដែលប៉ះពាល់ដោយផ្ទាល់ដល់ផលិតផលក្នុងស្រុកសរុប និងប៉ះពាល់ដល់វិស័យសំណង់និងខុនដូផងដែរ។ ឆ្នាំ២០២៥នេះ ត្រូវបានគេចាត់ទុកថា គឺជាឆ្នាំដ៏លំបាកមួយទៀត សម្រាប់ទីផ្សារអចលនទ្រព្យនៅក្នុងប្រទេសថៃ បើទោះបីជារាជរដ្ឋាភិបាលថៃ បានដាក់ចេញនូវវិធានការគាំទ្រជាបន្តបន្ទាប់ ដូចជាការកាត់បន្ថយថ្លៃផ្ទេរ និងចុះបញ្ជីការ ការសម្រួលកម្ចីទិញលំនៅស្ថាន និងការបន្ធូរបន្ថយលក្ខខណ្ឌនៃច្បាប់ពាក់ព័ន្ធក៏ដោយ។

នៅអំឡុងត្រីមាសទី១នៃឆ្នាំ២០២៥ ដំណើរការផ្ទេរនិងទូទាត់ប្រាក់នៅក្នុងវិស័យអចលនទ្រព្យគឺបានធ្លាក់ចុះប្រមាណជា ៣២% ដោយទឹកប្រាក់ត្រូវប្រមូលបាននៅក្នុងអំឡុងពេលនេះ គឺប្រមាណជា ១ពាន់៤រយលានដុល្លារ ប៉ុន្តែវិស័យនេះទទួលបានត្រឹមតែជាង ៩៥០ លានដុល្លារប៉ុណ្ណោះ ។

នៅក្នុងស្ថានភាពនេះអ្នកវិភាគបានអះអាងថា ដើម្បីកាត់បន្ថយហានិភ័យ ការអន្តរាគមន៍របស់រាជរដ្ឋាភិបាលជាបន្ទាន់ គឺចាំបាច់ ហើយកម្មវិធីដែលរាជរដ្ឋាភិបាលគួរជួយ មានដូចជា កម្មវិធីកម្ចី ដើម្បីសម្រួលសាច់ប្រាក់ងាយស្រួល ការបន្ធូរបន្ថយបទប្បញ្ញត្តិឥណទានសម្រាប់ស្ថាប័នហិរញ្ញវត្ថុ និងការគាំទ្រដំណើរការទូទាតសញ្ញាបណ្ណបំណុលអចលនទ្រព្យ ដែលកំពុងតែជិតដល់កាលកំណត់។

ជុំវិញបញ្ហា​នេះ លោក ប្រាសឺត ថេឌុលឡាយ៉ាសាធីត (Prasert Taedullayasatit ) ប្រធានសមាគមខុនដូថៃ បានបង្ហើបថា សមាគមបានជួបជាមួយទីប្រឹក្សានាយករដ្ឋមន្ត្រីហើយ កាលពីថ្ងៃទី ១០ ខែមេសា ដើម្បីពិភាក្សាអំពី ការឆ្លើយតបរយៈពេលខ្លី និងរយៈពេលវែងចំពោះផលប៉ះពាល់នៃការរញ្ជួយដីនាពេលថ្មីៗនេះ និងគោលនយោបាយពន្ធបដិការរបស់រដ្ឋាភិបាលសហរដ្ឋអាម៉េរិកលើវិស័យអចលនទ្រព្យរបស់ប្រទេសថៃ។

សមាគមខុនដូថៃ បានទទូចឱ្យរាជរដ្ឋាភិបាល អន្តរាគមន៍ក្នុងទីផ្សារមូលបត្របំណុលសាជីវកម្ម ដែលបច្ចុប្បន្នមានភាពផុយស្រួយ ជាពិសេសទាក់ទងនឹងមូលបត្របំណុលអចលនទ្រព្យ ដែលជិតដល់ពេលសងត្រឡប់នៅឆ្នាំនេះ ក្នុងគោលបំណង ការពារការបរាជ័យក្នុងដំណើរការទូទាត់សងបណ្ណបំណុល ជាពិសេសក្នុងចំណោមបណ្ណបំណុលដែលមានកូប៉ុង (អត្រាការប្រាក់)ខ្ពស់ និងក្រុមហ៊ុន ដែលប្រឈមនឹងការចុះខ្សោយនៃទំនុកចិត្តរបស់វិនិយោគិន រួមទាំងអ្នកដែលមានចំណាត់ថ្នាក់កម្រិតវិនិយោគទាបជាដើម៕

ដោយៈ សរ សុជាតិ