សេដ្ឋីនីម្នាក់រួចផុតពីការប្រហារជីវិត ក្រោយវៀតណាម កែប្រែច្បាប់ប្រហារជីវិត
រដ្ឋាភិបាលវៀតណាម បានសម្រេចលុបចោលទោសប្រហារជីវិតលើឧក្រិដ្ឋកម្មចំនួន៨រួមទាំងការស៊ីសំណូក និងការកេងបន្លំផងដែរ។ មន្ត្រីសភាជាន់ខ្ពស់របស់វៀតណា…
ក្រោយជួបប្រជុំគ្នាអស់រយៈពេល២ថ្ងៃ នៅទីក្រុងឡាអេ ប្រទេសហូឡង់ ក្រុមមេដឹកនាំអង្គការណាតូទាំង៣២រូប បានព្រមព្រៀងគ្នាបង្កើនខ្ទង់ចំណាយរហូតដល់៥%នៃផលិតផលក្នុងស្រុកសរុបលើវិស័យការពារជាតិ តាមការទាមទាររបស់លោក ដូណាល់ ត្រាំ។ ប្រទេសសមាជិកទាំងអស់សន្យាចំណាយ៣,៥%នៃ GDP របស់ពួកគេលើវិស័យការពារជាតិស្នូលដូចជាកងទ័ព និងសព្វាវុធ និងចំណាយ១,៥%ទៀត លើវិធានការការពារដូចជាសន្តិសុខតាមអ៊ីនធឺណិត ការការពារបំពង់បង្ហូរប្រេង និងការសម្រួលផ្លូវ និងស្ពានដើម្បីគ្រប់គ្រងយានយន្តធុនធ្ងន់ជាដើម។
ការគាំទ្រគោលដៅចំណាយខ្ពស់លើវិស័យការពារជាតិ របស់មេដឹកនាំណាតូនេះ មិនត្រឹមជាការឆ្លើយតបចំពោះចំណងរបស់លោក ត្រាំ ប៉ុណ្ណោះទេ ប៉ុន្តែថែមទាំងឆ្លើយតបចំពោះការភ័យខ្លាចរបស់អឺរ៉ុប ចំពោះការគំរាមកំហែងរបស់រុស្ស៊ីលើសន្តិសុខរបស់ពួកគេ បន្ទាប់ពីការលុកលុយលើអ៊ុយក្រែន នៅឆ្នាំ២០២២ ផងដែរ។
លោក ត្រាំ បានត្រឡប់ទៅអាម៉េរិកវិញដោយក្ដីសប្បាយរីករាយ ព្រោះលោកបានទទួលនូវអ្វីដែលលោកចង់បាននៅក្នុងកិច្ចប្រជុំប្រចាំឆ្នាំរបស់សម្ពន្ធយោធាមួយនេះ ខណៈសម្ពន្ធមិត្តណាតូក៏មានភាពធូរស្រាលចិត្តផងដែរ ក្រោយពីបានឮការប្តេជ្ញាចិត្តរួមគ្នាជាពិសេសបានឮពីលោក ត្រាំ តែម្ដងចំពោះគោលការណ៍ជាមូលដ្ឋាននៃការការពារជាសមូហភាព។
លោក ត្រាំ បានប្រាប់សន្និសីទសារព័ត៌មានក្រោយកិច្ចប្រជុំកំពូលនេះថា លោកមានជ័យជម្នះដ៏អស្ចារ្យនៅក្នុងកិច្ចប្រជុំនេះ ហើយលោកសង្ឃឹមថា មូលនិធិបន្ថែមនេះនឹងត្រូវបានចំណាយលើផ្នែករឹងនៃយោធាដែលផលិតនៅសហរដ្ឋអាម៉េរិក។ ជាមួយគ្នានេះលោក ត្រាំ បានបញ្ជាក់ជំហរថា លោកនឹងឈរនៅជាមួយអង្គការណាតូ៕
ដោយ៖ សុខ មង្គល
