លោក ស្រ៊ុន ពៅ ប្រធានសមាគមអ្នកចិញ្ចឹមសត្វកម្ពុជា បានអះអាងថា ការហក់ឡើងតម្លៃប្រេងឥន្ធនៈដោយសារសង្គ្រាមនៅមជ្ឈិមបូព៌ាជិត១ខែកន្លងមកនេះមិនទាន់ជះឥទ្ធិពលធ្ងន់ធ្ងរដល់វិស័យចិញ្ចឹមសត្វនៅកម្ពុជា នោះទេ។ បើតាមការវាយតម្លៃរបស់ប្រធានសមាគមរូបនេះ មកទល់ពេលនេះវិស័យចិញ្ចឹមសត្វនៅកម្ពុជា បានរងផលប៉ះពាល់ចន្លោះពី៣ ទៅ៥%ប៉ុណ្ណោះ។ តែទោះជាយ៉ាងណាក៏ដោយ តម្លៃជ្រូករស់បានហក់ឡើងថ្លៃដោយបច្ចុប្បន្នអាចលក់បានចន្លោះពី១,១០០០រៀលទៅ១,២០០០រៀលក្នុងមួយគីឡូក្រាម។
មិនខុសគ្នានោះទេ លោក សាន់ ចាន់ថេត ប្រធានសមាគមផ្គត់ផ្គង់ជ្រូកកម្ពុជា បានអះអាងថា បច្ចុប្បន្នតម្លៃជ្រូករស់បានហក់ឡើងដល់១,២០០០រៀលក្នុងមួយគីឡូក្រាម ដែលធ្វើឱ្យតម្លៃសាច់ដាក់លក់នៅលើទីផ្សារមានការកើនឡើងទៅតាមនឹងផងដែរ ដែលកត្តានេះកំពុងបង្កជាក្តីបារម្ភដល់អ្នកបរិភោគចុងក្រោយ។ យ៉ាងណាមិញ ប្រធានសមាគមរូបនេះ ស្នើឱ្យក្រុមហ៊ុនចិញ្ចឹមសត្វជ្រូកធំៗក្នុងស្រុក កុំដំឡើងថ្លៃជ្រូករស់បន្ថែមទៀត ដើម្បីជៀសវាងការប៉ះពាល់ដល់ជីវភាពអ្នកបរិភោគ ស្របពេលដែលចំនួនអ្នកចិញ្ចឹមជ្រូកខ្នាតតូចក្នុងស្រុកកំពុងថយចុះគួរឱ្យកត់សម្គាល់។
មិនមែនមានតែតម្លៃសាច់ជ្រូកនោះទេ ដែលបានហក់ឡើង សូម្បីស៊ុតមាន់ និងស៊ុតទា ក៏មានការកើនឡើងផងដែរ។ បើតាមលោក យន់ ងន់ហុង អនុប្រធានសហគមន៍ចិញ្ចឹមមាន់ស៊ុតខេត្តកំពង់ស្ពឺ បច្ចុប្បន្នស៊ុតមាន់លេខ២ ដែលឈ្មួញចុះទៅប្រមូលប្រទិញដល់កសិដ្ឋានមានតម្លៃ២៩០រៀលក្នុងមួយគ្រាប់ ខណៈកាលពីខែមុនអាចលក់បានត្រឹមតែ២៦០រៀលក្នុងមួយគ្រាប់ប៉ុណ្ណោះ។
អត្ថបទគួរអាន
តែទោះជាយ៉ាងណា ប្រធានសមាគមរូបនេះអះអាងថា តម្លៃនេះមិនអាចផ្តល់ប្រាក់ចំណេញដល់កសិករនោះទេ បើទូទាត់នឹងការចំណាយលើថ្លៃចំណីសត្វ តម្លៃប្រេងឥន្ធនៈដែលកំពង់ហក់ឡើង និងកម្លាំងពលកម្ម។
ស្របពេលតម្លៃសាច់ជ្រូក និងស៊ុតមានការកើនឡើង តម្លៃត្រីឯណោះវិញបែរជាមានការធ្លាក់ចុះទៅវិញ។ ជាក់ស្តែងបើតាមការអះអាងរបស់លោក ឡែមផូរ សុថាវរិទ្ធិ ប្រធានគណៈកម្មការប្រតិបត្តិ នៃសមាគមវារីវប្បករនៅកម្ពុជា តម្លៃត្រីរ៉ស់ចាប់ដល់កសិដ្ឋានអាចលក់បានក្នុងរង្វង់៥,៥០០រៀលក្នុងមួយគីឡូក្រាម ខណៈកាលពីខែមុនអាចលក់បានរង្វង់៦,៥០០រៀលក្នុងមួយគីឡូក្រាម។ ជាមួយគ្នានេះ ត្រីឆ្ដោអាចលក់បានក្នុងតម្លៃ៩,០០០រៀលក្នុងមួយគីឡូក្រាម ខណៈកាលពីពីរខែមុនអាចលក់បានក្នុងរង្វង់១២,០០០រៀលក្នុងមួយគីឡូក្រាមឯណោះ។ លោកបញ្ជាក់ថា ការធ្លាក់ចុះនេះមិនមែនដោយសារគ្មានអ្នកទិញនោះទេ គឺដោយសាររដូវនេះជារដូវប្រមូលផលចិញ្ចឹម គួបផ្សំរដូវនេះសម្បូរត្រីធម្មជាតិ ដែលធ្វើឱ្យត្រីចិញ្ចឹមពិបាកប្រកួតប្រជែងតម្លៃ។
ជាដំណោះស្រាយនៅចំពោះមុខតម្លៃប្រេងឥន្ធនៈកំពុងហក់ឡើងខ្ពស់ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានជំរុញឱ្យម្ចាស់សហគ្រាស និងអ្នកផលិតក្នុងស្រុកងាកមកប្រើប្រាស់ថាមពលពន្លឺព្រះអាទិត្យជំនួសឱ្យប្រេងឥន្ធនៈ។ ទោះជាយ៉ាងណា អ្នកជំនាញផ្នែកសេដ្ឋកិច្ចបានផ្តល់ជាមតិថា រដ្ឋត្រូវសម្របសម្រួលឱ្យតម្លៃ នៃការដំឡើងថាមពលបៃតងនេះមានតម្លៃសមរម្យ ទើបអាចជួយសង្គ្រោះវិស័យផលិតកម្មក្នុងស្រុកឱ្យមានដង្ហើមឡើងវិញក្នុងកាលៈទេសៈ ដែលតម្លៃប្រេងពិភពលោកហក់ឡើងខ្ពស់នេះ៕
អត្ថបទ៖ ជា ម៉ារ៉ា
